Abaturage bo mu kagari ka Rwinyemera mu murenge wa Karangazi biyujurije ikiraro gihuza akagari kabo n’aka Kizirakome, buri muturage akaba yaratangaga umusanzu we uko yifite; igikorwa Ubuyobozi bw’akarere ka Nyagatare bubashimira kigaragaza ko bumva uruhare rwabo mu kubaka igihugu.
Umuyobozi w’Akarere ka Nyagatare Gasana Stephen ubwo yaganiraga n’itangazamakuru ku bijyanye n’iyubakwa ry’iki kiraro, yagize ati: “Ibi bivuze kwishimira kwiyubakira igihugu nabo ubwabo babigizemo uruhare.”
Akomeza agira ati: “Kuba bariyubakiye ikiraro bafashije Leta, kuko aho bishoboka abaturage bajya basana cyangwa bakiyubakira ibiraro, amashuri n’amazu, aho bananiwe Leta ikabikora.”
Bamwe mu baturage baganiriye na MUHAZIYACU bavuga ko aha hantu kubera amazi ahari, yari yarababujije kuhanyura bajya gutega imodoka kuri kaburimbo, cyangwa bagiye ku biro by’akagari kabo ka Rwinyemera.
Uwitwa Kubahoniyesu John wagize uruhare mu iyubakwa ry’icyi kiraro aho yatanze umusanzu w’amafaranga y’u Rwanda agera ku bihumbi 600Frw, yagize ati: “Twari twaragowe kuko uyu muhanda wari waruzuye amazi kandi ariwo utugeza ku buyobozi bwacu bw’akagari, ntawahanyuraga ari ku igare, moto cyangwa imodoka kuko wabaga wagwa muri aya mazi yari ahari; Ariko ubu twarakiyubakiye byaradufashije cyane kuba tuhanyura nta mpungenge kubera ubushobozi bwacu twumva natwe hari umusanzu twateye Leta.”
Naho uwitwa Mukurizehe Salah we yagize ati: “Aha hatarajya iki kiraro, umuhungu wanjye ampetse kuri moto twaguyemo ajya kuyikoresha nanjye nkomereza kwa muganga, tumaze kubona uko hatubangamiye twaricaye twiyemeza kuhitunganyiriza.”
Kubera uko iki kiraro kitari gihari kandi huzuye hareka amazi, aba baturage kugira ngo bagere ku biro by’akagari kabo byabasabaga gukora urugendo rurerure rwo kunyura Karangazi bateze moto bakishyura amafaranga 3000Frw kugenda no kugaruka. Bakavuga ko kubera kwishakamo ibisubizo byatumye baruhuka aya matike kuko ubu bishyura amafaranga 1000Frw kugenda no kugaruka.
Icyi kiraro cyakozwe n’aba baturage bo ubwabo nta nkunga ya Leta ijemo ibikorwa byo kucyubaka byamaze amezi atatu, aho buri rugo rwo muri aka kagari ka Rwinyemera rwatangaga umusanzu mu buryo bw’amafaranga cyangwa mu bikorwa by’umuganda bitewe n’ubushobozi bw’abagize urugo. Kikaba cyaruzuye gitwaye amafaranga y’u Rwanda agera kuri miliyoni enye, yose yatanzwe n’aba baturage bo mu kagari ka Rwinyemera.
Inkuru bifitanye isano: Nyagatare : Abaturage bari kwiyubakira ikiraro cya miliyoni 4 Frw kugira ngo kibafashe mu buhahirane
