Abadepite baganiriye n’ urubyiruko rwo mu Karere ka Nyagatare ku mateka ya Jenoside yakorewe Abatutsi mu mwaka 1994, barusaba kwirinda ingengabitekerezo ya Jenoside n’amacakubiri no kurwanya uwo ariwe wese uyipfobya cyanywa akayihakana.
Ni ibiganiro byatanzwe kuri uyu wa 17 Gashyantare, muri gahunda y’ Abasenateri n’Abadepite bagize Ihuriro ry’abagize inteko ishinga amategeko rikumira jenoside, ihakana n’ipfobya rya Jenoside yakorewe Abatutsi ryateguye ingendo mu turere twose tugize Igihugu; hagamijwe gusobanurira urubyiruko amateka ya Jenoside yakorewe Abatutsi mu 1994.
Mu Karere ka Nyagatare ibi biganiro byari biyobowe na Depite Uwimanimpaye Jeanne d’Arc na Depite Tengera Twikirize Francesca; aho bagarutse ku mateka y’ukuntu jenoside yateguwe na leta yari iriho ndetse ikanayishyira mu bikorwa.
Depite Uwimanimpaye Jeanne d’Arc yasabye urubyiruko kwirinda ingengabitekerezo ya jenoside n’igisa nayo anarubwira ibiranga itegurwa rya jenoside; ati: “Jenoside itegurwa na leta ikanashyirwa mu bikorwa na leta, iyo ijya gutangira irabanza ikigishwa mu rubyiruko bagatozwa kwanga urunuka ubwoko bumwe buba buri gukorerwaho jenoside.”
Naho Depite Tengera Twikirize Francesca we yagarutse k’uko urubyiruko rugomba kujya rwamagana abahakana n’abapfobya Jenoside cyane cyane binyuze ku mbuga nkoranyambaga; akomeza agira ati: “Mukwiye kumenya aya mateka ya jenoside bigatuma murushaho kurwanya uwari we wese wagerageza kubabibamo amacakubiri akurura jenoside.”
Umuyobozi w’Akarere ka Nyagatare wungirije ushinzwe iterambere ry’ubukungu Matsiko Gonzague na we yagarutse ku buryo jenoside yakorewe Abatutsi yari yarateguwe ikanacengezwa mu rubyiruko na leta yari iriho.
Ati: “Kubona umuntu yigishwa amacakubiri ya jenoside bikagera n’aho yica umugore we ngo ni ubwoko runaka, birababaje mukwiye kubyirinda rubyiruko rwacu.”
Rumwe mu rubyiruko rwitabiriye iki kiganiro rwagaragaje kunyurwa n’impanuro rwahawe, nk’uko Iratsinze Emery yabigarutseho agira ati: “Ibi biganiro ni byiza, nkatwe tukiri bato biratwubaka bigatuma turushaho kurwanya uwari we wese washaka kutuzanamo amacakubiri aganisha kuri jenoside.”
Naho Munyana Annet na we aragaruka ku kamaro k’ibi biganiro, yagize ati: “Kuba twahawe ibi biganiro ni byiza ni ukutwigisha amateka ya jenoside bikadufasha kwirinda, no kuguma gukunda igihugu cyacu.”
Ibi biganiro biri kuba mu turere twose, biri guhuza urubyiruko n’abagize inteko ishinga amategeko bikibanda ku mateka yaranze jenoside yakorewe Abatutsi mu 1994; kugira ngo higishwe urubyiruko rw’abanyarwanda amateka ndetse rurusheho no kurwanya abagerageza kubabibamo amacakubiri n’ingengabitekerezo ya jenoside.
Jenoside yakorewe abatutsi mu Rwanda mu mwaka 1994 yahitanye abarenga miliyoni.
