Umwarimu witwa Mukasibaniro Anitha wo mu Murenge wa Kazo, Akarere ka Ngoma, wigisha kuri G.S Kibimba, aravuga ko yatunguwe no kohererezwa ibaruwa n’ubuyobozi bw’Akarere asabwa ibisobanuro ku byo kudategura neza amasomo kandi we avuga ko ari mu kiruhuko cyo kubyara.
Uyu mwarimu avuga ko birumvikana ukuntu yasabwa ibisobanuro kandi atari mu kazi.
Yavuganye n’ibitangazamakuru bya Flash, ati: “Byarantunguye kuko njyewe ndi mu kiruhuko cyo kubyara nemererwa n’amategeko.”
Mu ibaruwa MUHAZIYACU yabonye, ubuyobozi bw’Akarere ka Ngoma bumushinja kudategura neza amasomo no kutuzuza ibitabo byabugenewe.
MUHAZIYACU yahamagaye Umuyobozi w’Akarere ka Ngoma, Niyonagira Nathalie kuri iki kibazo, avuga ko aribyo kokk basabye uyu mwarimu ibisobanuro kuri iyo mikorere ye, bise “rikomeye”.
Yagize ati: “Azabidusobanurira nta kibazo. Nta kidasanzwe.”
Akarere ka Ngoma kuri Twitter kanditse ubundi butumwa bugira buti ” Mwiriwe?
Mu minsi ishize duherutse gukora inspection ku bufatanye na @NESA_Rwanda twasanze hari abarimu batitabiriye akazi. Uyu mwarimu rero turamugira inama yo gutanga ibisobanuro ku gihe kuko umuyobozi wagombaga gutanga amakuru y’abadahari nawe twasanze atari ku kazi.”
Hagati aho, uyu mwarimu asabwe gutanga ibisobanuro bitarenze iminsi itanu abonye iyi baruwa yo kuwa 16 Ugushyingo 2022.
