Mu Karere ka Ngoma bizihije umunsi mukuru wo kwibohora ku nshuro ya 31, bishimira ibyiza bagezeho n’akamaro urugamba rwo kubohora Abanyarwanda rwagize, ndetse banaremera abaturage batishoboye inka 9 zizabafasha mu mibereho myiza n’iterambere.
Ni umunsi wizihirijwe mu Murenge wa Kibungo kuri Stade y’Akarere ka Ngoma, ubanzirizwa n’akarasisi k’amwe mu mahuriro y’abatuye muri uyu Murenge(Abamotari, Abanyonzi, Abikorera n’abandi) yazengurukaga Stade mu nkwishimira kuba barayihawe na Perezida wa Repulika y’u Rwanda, Kagame Paul n’imihanda bubakiwe.
Wanaranzwe n’imbyino za gakondo z’amatorero atandukanye, uwarokotse Jenoside yakorewe Abatutsi na we yaremewe ibihumbi 100Frw no kuremera abaturage ibiseke, ibitenge n’ibindi bitandukanye.
Kwizihiza uyu munsi, ni gihe cyiza cyo kwishimira ibyiza u Rwanda rwagezeho, akamaro urugamba rwo kubohora Abanyarwanda rwagize, guha agaciro abagize uruhare ngo urugamba rurangire, guha agaciro ibyagezweho no gutekereza ku hazaza, gusigasira ibyo Igihugu cyagezeho.
Bamwe mu baremewe babwiye MUHAZIYACU ko bashimira Perezida Paul Kagame wazanye gahunda ya Girinka Munyarwanda nka kimwe bishimira muri iki gihe bizihiza kwibohora.
Mukamana Louise, ati: “Iyi nka igihe kumfasha kwiteza imbere nikura mu bukene, imirire mibi, ariyo mpamvu nshimira Perezida Kagame Paul wafashe iya mbere mu kubohora Igihugu mu gihe twari tuboshywe nk’abagore, ubu tukaba dufite ijambo, akaba yaranazanye na gahunda ya Girinka.”
Umuyobozi w’Ingabo z’u Rwanda zikorera mu Karere ka Kayonza, Ngoma na Kirehe, Col. Pascal Munyankindi yatanze ikiganiro ku rugendo rw’amateka y’urugamba rwo kubohora Igihugu.
Col. Munyankindi yasabye urubyiruko gukorera no kwitangira Igihugu kugira ngo ibyiza bikomeje kugerwaho birusheho gusigasirwa no kwiyongera.
Umuyobozi w’Akarere ka Ngoma, Niyonagira Nathalie, yashimiye Perezida wa Repubulika, Paul Kagame n’Ingabo yari ayoboye zabohoye u Rwanda, anashimira iterambere akomeje kubagezaho mu mibereho myiza, iterambere n’imiyoborere myiza.
Meya Niyonagira akomeza agira ati: “Hari abari barorojwe mu myaka yashize inka zabo zabyaye nabo bashima kworoza abatishoboye, ni kintu duha agaciro cyane kuko inka ifite ibintu ishyira mu bantu, icya mbere ni urukundo(imibanire), inka ni ubukungu, inka imara ni irungu.”
Yongeye gushimira Kagame Paul wazanye gahunda ya Girinka, anasaba abagabiwe inka kuzifata neza bakazitaho kugira ngo zibagirire umumaro.
Kwizihiza uyu munsi byasojwe n’umukino warangiye inzego z’umutekano zinganyije n’abakozi b’Akarere igitego 1-1.
