Abaturage 241 bo mu Karere ka Ngoma bigishijwe gusoma, kwandika no kubara bakuze barangije amasomo bakanahabwa impamyabumenyi bishimiye ko bateye intambwe bakava mu bujiji nyuma y’amezi atandatu bigishwa.
Abigishijwe gusoma, kubara no kwandika, bari mu kigero cy’imyaka 17 na 55, aba basaga 240 bahawe impamyabumenyi ku wa mbere w’iki cyumweru ni abo mu Murenge wa Rurenge.
Icyo abaganiriye na MUHAZIYACU bahurirazaho ni uko mbere yo kwiga biberaga mu bujiji no kudasobanukirwa, umwe muri bo ni Mukabarore Philomene w’imyaka 47, Yagize ati: “Twateye intambwe ituvana mu bujiji, mbere umuntu yarampagaraga kuri telefone nkajyana kwa mugenzi wanjye ngo andebere umpamagaye, ariko ubu sinkibigira, byose narabimenye ubutumwa bugufi nzi kubusoma, ubu aho nagenda nagera ku cyapa cyanyobora ntabanje kubaza.”
Mukakibibi Jacqueline ufite imyaka 35 yemeza ko iyo yageraga ahantu bisaba ko yandika byamuteraga ipfunwe mu bandi kubabwira ko bamwandikira cyangwa bamusomera ibyanditswe cyane cyane amatangazo amanikwa ku biro by’Akagari n’izindi nyandiko.
Hari n’umukobwa witwa Niragire Sandrine afite imyaka 17 nawe yahawe amahugurwa yo gusoma, kubara no kwandika, Umunyamakuru wa Muhaziyacu amusanze aho ahagaze ku ruhande afite urupapuro rw’ishimwe yahawe rwemeza ko yarangije kwiga kubara, yari afite akanyamuneza.
Niragire uvuga ko atagize amahirwe yo gukandagira mu ishuri kuko ababyeyi be bamaze kwitaba Imana yatangiye ubuzima bukomeye bwo kwirwanaho, ubu acuruza imineke; yemeza ko kutamenya gusoma, kwandika no kubara byamuhombeje cyane.
Yakomeje agira ati: “Nabonye abandi bajya mu isoko gucuruza imineke ndabakurikira ariko ntibyari byoroshye, ni bo bamfashaga kubara amafaranga igihe hari ayo ngomba kugarurira umukiriya, ariko ubu meze neza ndacuruza nta kibazo, kandi amafaranga ndayabona; ibi mbikesha ko namenye kubara gusoma no kwandika.”
Umuyobozi w’Akarere ka Ngoma Nambaje Aphrodise yasabye aba baturage bahawe ubu bumenyi kurushaho kubusigasira, bakamenya ko kwiga ari uguhozaho ndetse ntibagire isoni zo kwiga kuko ubumenyi butajya burangira.
Yakomeje agira ati: “Ndagira ngo mbasabe mukomeze mwihugure kenshi, mwitoze gusoma cyane mu bimina byanyu mubamo, mube n’abanditsi n’abanyamabanga b’ibyo bimina, nimugende mujye mu matorero musengeramo mwitoze gusomera mu ruhame, mwitoze, namwe muzitabire kwitoresha mu myanya y’abayobozi b’inzego z’ibanze, muzaharanire kuzaba muri iyo myanya ya ba mutwarasibo na ba mudugudu.”
Mu mihigo y’Akarere ka Ngoma harimo n’uwo kwigisha abantu bakuze batazi gusoma kubara no kwandika, ibi bigerwaho ku bufatanye bw’akarere n’abafatanyabikorwa bako biganjemo abo mu madini n’amatorero.
