Mu isiganwa ry’amagare ryitiriwe Inkura “Akagera Rhino Race” ryabaye kuri uyu wa Kabiri rigasorezwa mu Karere ka Kayonza, mu basiganwa babigize umwuga ryegukanwe na Muhoza Eric mu bagabo na Ingabire Diane mu bagore.
Kayonza: hari kuba isiganwa ry'umukino w'amagare ryitiriwe Inkura #AkageraRhinoRace" ryateguwe ku bufatanye bwa @KayonzaDistrict, @AkageraPark na @cyclingrwanda rigamije kwishimira ibyagezweho mu kubungabunga pariki, no kwerekana amahirwe y'ishoramari ari i Kayonza. #RwOX pic.twitter.com/F2XlMs6cl6
— MUHAZI YACU (@muhaziyacu) December 26, 2023
Kuri uyu wa kabiri tariki 26 Ukuboza 2023 mu Karere ka Kayonza habereye isiganwa ry’amagare ryiswe Akagera Rhino Race, ryitabiriwe n’abakinnyi babigize umwuga ndetse n’abatarabigize umwuga mu bagabo no mu bagore.
Iri siganwa ryitabiriwe n’abasiganwa 54 babigize umwuga ndetse abakinnyi 168 batabigize umwuga bakoresha amagare asanzwe ryari rigamije kwishimira ibyagezweho mu kubungabunga pariki y’Akagere ibikorwaremezo byubatswe harimo n’imihanda irimo gukoreshwa uyu munsi no kwerekana amahirwe yo gushoramo imari.
Abasiganwa mu babigize umwuga bahagurukiye Rugende barasoreza kuri sitade ya Rwinkwavu. Naho abakoresha amagare yabo asanzwe bita #Matabaro, batangiye kuzenguruka imirenge ikikije Pariki y'Akagera; nabo barasoreza kuri Sitade ya Rwinkwavu. @cyclingrwanda #visitkayonza pic.twitter.com/haVFnWAVAf
— MUHAZI YACU (@muhaziyacu) December 26, 2023
Muhoza Eric ni we waryegukanye mu bagabo naho Ingabire Diane aryegukana mu bagore mu bakina nk’ababigize umwuga, naho mu batarabigize umwuga mu bagabo hatsinze Ukurikiye Xavier naho mu bakobwa uwa mbere yabaye Muragijimana Diane.
Umuyobozi w’Akarere ka Kayonza Nyemazi John Bosco yavuze ko iri rushanwa ryateguwe ku bw’ibyiza byinshi aka karere kagezeho.
Yongeyeho ko Pariki y’Akagera izateramo inkunga abaturage kugira ngo bakomeze gutera imbere bivuye mu nyungu yinjijwe n’iyi pariki kuko 10% yayo agaruka mu baturage.
Yagize ati: “Hari imishinga iri gushyirwa mu bikorwa harimo kwagura ubworozi buri mu mudugudu w’icyitegererezo wa Rwinkwavu, imishinga yo gushyigikira ubworozi mu mirenge itandukanye,Mwili na Gahini,imodoka zifasha gutwara umukamo, umuyoboro w’amazi, imashini itunganya umusaruro w’urusenda n’ibindi.”
Bamwe mu baturage baturiye Pariki y’Akagera bahamya ko inyungu ziva kuri pariki ari nyinshi.
Nyirahabineza Gertulide yagize ati: “Pariki idufasha byinshi bitandukanye gufasha abatishoboye ndetse inkunga baduha zidufasha no kurihira abanyeshuri amashuri.”
Fils Faraji na we yunzemo ati: “Iyi pariki idufasha kubona mituweri, no gukemura ibibazo bitandukanye, urabona uyu munsi twarebye ibirori by’igare dore kaburimbo igera hano n’ibindi byinshi ntabasha kurondora.”
Guverineri w’Intara y’Iburasirazuba Pudence Rubingisa yibukije abari ahasorejwe iri siganwa ko amagare afite umwihariko muri iyi ntara kuko amasiganwa yayo yahereye mu ntara y’Iburasirazuba anagaruka kandi ko siporo ari mwe mu mbaraga z’igihugu bityo ko urubyiruko rukwiye kuyitabibira rukirinda kujya mu ngeso mbi.
Yagize ati:” Siporo nimwe mu mbaraga z’lgihugu nk’urubyiruko rero biradusaba kuba ba nkore neza bandebereho kuko hari urubyiruko nkamwe ruhesha ishema Igihugu kugira ngo tubigereho hari ibyo tugomba kwihana harimo ubusinzi, ikoreshwa ry’ibiyobyabwenge n’izindi ngeso mbi zatuma mutagera ku ntego, nk’urubyiruko rero biradusaba kuba maso dukora ibyingirakamaro.”
Yavuze kandi ko hakwiye kubaho ubufatanye iri siganwa rigakomeza kuba ngaruka mwaka.
Iri siganwa ryitiriwe Inkura “Akagera Rhino Race” ryateguwe mu rwego rwo kwishimira igaruka ry’inkura n’uburyo Pariki y’Akagera ikomeje kubungabungwa ryatangiye mu mwaka wa 2017 riatangira ryitabiriwe n’abatarabigize umwuga naho uyu mwaka ku bufatanye na FERWACY n’Akarere ka Kayonza hiyongereyemo n’ababigize umwuga.
