Mu Karere ka Rwamagana kugeza ubu habarurwa imiryango 548 yazimiye burundu, abari bagize iyi miryango bose bishwe mu gihe cya Jenoside yakorewe Abatutsi mu 1994.
Ku itariki ya 16 Gicurasi, ni umunsi i Rwamagana wahariwe kwibuka ku nshuro ya 32 Jenoside yakorewe Abatutsi mu 1994 by’umwihariko imiryango yazimye.
Muri aka Karere kugeza ubu hari imiryango 548 yari igizwe n’abantu 2,451, iyi miryango yari igizwe n’abagore, abagabo abagore n’abana bose bishwe ku buryo nta muntu n’umwe wasigaye mu bawukomokaho.
Visi Perezida wa Sena Amb. Nyirahabimana Solina wifatanyije n’abanyarwamagana bo mu Murenge wa Rubona mu gikorwa cyo kwibuka imiryango yazimye, yavuze ko aya ari amateka mabi y’Igihugu kandi akwiye gushingirwaho hamaganwa abapfobya Jenoside yakorewe Abatutsi.
Yakomeje agira ati: “Iyo tubonye iyi mibare (y’imiryango yazimye) bitwereka neza ubukana Jenoside yakoranwe, iyo imiryango ijya kuzima bigaragara ko hari harabayeyo umugambi wo kurimbura no kumaraho biba ku miryango imwe, iyindi Inkotanyi ziragoboka”
Umunyamabanga mukuru wa IBUKA ku rwego rw’Igihugu ni Mujyambere Jean Louis de Montfort yibukije ko iyi miryango yazimye yibukwa kugira ngo hasubizwe agaciro abishwe, yakomeje agira ati: “Kwibuka ni ukurinda ukuri kw’amateka no kurwanya abashaka gupfobya Jenoside yakorewe Abatutsi, uyu mwaka ni intambwe ikomeye cyane kuko nibwo bwa mbere iki gikorwa cyo kwibuka imiryango yazimye gikozwe ku rwego rw’Akarere”
Ibi bisobanuye ikintu gikomeye kuko Jenoside yakorewe Abatutsi yabereye mu midugudu aho abantu bari batuye hagati y’abaturage, bityo Kwibuka bigafasha gusobanukirwa neza amateka y’aho abantu batuye kandi bigatuma bafata inshingano zo kuyasigasira.
Imibare itangazwa n’Akarere ka Rwamagana igaragaza ko mu karere kose hari imwe mu mirenge yagize imibare myinshi y’imiryango yazimye kandi nabyo bifite aho bihuriye n’itegurwa, icengezamatwara byakozwe kugira ngo hazakorwe Jenoside yakorewe Abatutsi.
Mu byahujwe byari amakomine bikabyara Akarere ka Rwamagana, harimo icyari Komine Bicumbi, ubu igice kinini kiri mu mirenge ya Gahengeri, na Rubona, na Nzige, iyi Komine Bicumbi yayobowe na Burugumesitiri Semanza Laurent wari inshuti ya Habyarimana cyane akaba yari afite urugo muri Gahengeri, ndetse Interahamwe zo muri ibi bice zitorezaga inyuma y’ibiro bya Komine (ahakorera Umurenge wa Nzige) ibi bigasobanura impamvu mu mirenge itatu iza ku isonga mu kugira imiryango myinshi yazimiye harimo iyo muri Bicumbi.
Umurenge wa Gahengeri niwo ufite imiryango myinshi yazimye kuko habarurwa imiryango 113 yari igizwe n’abantu 449, Umurenge wa Rubona ukirikiraho nawo ufite imiryango 84 yazimye ikaba yari igizwe n’abantu 362, naho uwa gatatu ni Gishari ifite imiryango 67 yari igizwe n’abantu 275.
Mu Rwanda hose hamaze kubarurwa imiryango yazimye 15,593 yari igizwe n’abantu barenga ibuhumbi 68.
