Abakristu b’Itorero ADEPR Kayenzi mu Murenge wa Nyamata bibutse Abatutsi barenga 600 biciwe ku rusengero rw’iri torero muri Jenoside yakorewe Abatutsi mu 1994, bagaya abari abashumba n’abakristu babo bagize uruhare muri ubwo bwicanyi, barimo uwari Umushumba w’iryo torero, Uwinkindi Jean wahamijwe n’inkiko icyaha cya Jenoside yakorewe Abatutsi agakatirwa igihano cyo kufungwa burundu.
Igikorwa cyo kwibuka cyabaye kuri uyu wa Gatatu tariki 13 Werurwe 2026, kikaba cyitabiriwe n’Umuyobozi w’Akarere ka Bugesera wungirije ushinzwe imibereho myiza y’abaturage Imanishimwe Yvette ari kumwe n’Umushumba Mukuru w’Itorero ADEPR, Rev. Pastor Ndayizeye Isaie, abandi bayobozi ndetse n’abaturage b’Umurenge wa Nyamata.
Rev. Ndayizeye yanenze abashumba n’abakristu bagize uruhare muri Jenoside yakorewe Abatutsi ariko anashima bamwe mu bagize umutima mwiza barokora Abatutsi.
Ati: “Turashimira abashumba n’abanyetorero barinze igihango cy’ubutumwa bwiza, barinda igihango na kirazira by’Abanyarwanda bagira uruhare mu kurokora abahigwaga ndetse bamwe bahasiga n’ubuzima.”
Akomeza atanga ingero, ati: “Urugero twavuga mwarimu Silas Ntamfurayishyari wo ku itorero rya Nyabagendwa wahawe ishimwe ry’umurinzi w’igihango na Nyakubahwa Perezida wa Repubulika, na Havugimana Alphonse bakoze ibikorwa byo kurwana ku batutsi bahigwaga. Ibi bikomeza kutwereka ko gukora ibyiza ari amahitamo.”
Rev. Ndayizeye kandi yagaye abagize uruhare muri Jenoside yakorewe Abatutsi, basengeraga muri ADEPR.
Yagize ati: “Ibi kandi bituma buri gihe dukomeza kugaya ababaye ibigwari bari abashumba, abakristu; abo bahemukiye itorero, bahemukiye Imana, bahemukiye u Rwanda kuko ntibarinze ubutumwa bwiza bwo gukora ibikorwa by’urukundo ahubwo bakora ibikorwa by’ubugome bica bagenzi babo basenganaga.
Umushumba wa ADEPR kandi yakomoje ku bapasiteri baherutse kwamburwa inshingano kuko bahamijwe n’inkiko icyaha cya Jenoside, avuga ko badakwiye kwitwa izina rya gishumba.
Umuyobozi w’Akarere ka Bugesera wungirije ushinzwe imibereho myiza y’abaturage, Imanishimwe Yvette na we yagarutse ku bantu bari bafite inshingano mu itorero bakoze Jenoside.
Ati: “Birababaje kugirira icyizere umuntu ukamugana uzi ko ariwe uhungiyeho bikarangira ariwe ugutanze. Turabakomeje abarokokeye Jenoside hano i Kayenzi.”
Yibukije buri wese kandi ko kwibuka bifasha isi yose kuzirikana agaciro k’ikiremwa muntu, ati: “Iyo twibuka, twibutsa isi yose ko kubaha ikiremwa muntu ari inshingano ya buri wese. Turangwe n’ubumuntu, umuntu yumve ko ari nk’undi kugira ngo dufatanyirize hamwe kugira ngo Jenoside yakorewe Abatutsi ntizongere kubaho ukundi.”
Amateka y’Itorero ADEPR Kayenzi mu gihe cya Jenoside yakorewe Abatutsi ntiwayavuga wirengagije uwayoboraga iri torero muri icyo gihe, Pasiteri Uwinkindi Jean wahagarikiye interahamwe zikica Abatutsi barenga 600 bari bahungiye kuri urwo rusengero maze Uwinkindi akabasohora kugira ngo interahamwe zibice.
Ubu Pasiteri Uwinkindi Jean ari mu Igororero rya Mpanga aho yakatiwe igifungo cya burundu nyuma yo guhamwa n’inkiko icyaha cya Jenoside yakorewe Abatutsi.
