Ubuyobozi bw’Akarere ka Kirehe n’abafatanyabikorwa bako biyemeje gufasha abaturage guhangana n’ikibazo cy’imibereho, ikaba myiza kurushaho.
Kuri uyu wa 24 Gicurasi, ubuyobozi bw’Akarere ka Kirehe hamwe n’abafatanyabikorwa bako baganiriye kuri gahunda yo gukemura ibibazo bibangamiye imibereho myiza y’abaturage, muri izi gahunda harimo kubakira abatishoboye, ikibazo cyo kugwingira kw’abana, ingo zitagira ubwiherero, abaturage bakirarana n’amatungo
Umuyobozi w’Akarere ka Kirehe Rangira Bruno yemeza ko ibiganiro bagiranye bigamije gushaka igisubizo ku bibazo bibangamiye imibereho y’abaturage,
Yakomeje agira ati: “Hari umwe mu bafatanyabikorwa bacu wiyemeje guherekeza umuturage imyaka itatu ibyo bireba niba twamufashije kugira ngo atazongera kugaruka muri wa murongo w’abafashwa, natwe akarere twafashe iyo gahunda yo guherekeza umuturage niba tugahe inzu tugushyire mu zindi gahunda z’imibereho myiza niba ari VUP cyangwa hari umufatanyabikorwa uguhaye inka, kugira ngo tutaguha inzu gusa ahubwo ubone n’ibindi bikorwa biguherekeza mu mibereho yawe.”
Izi gahunda zo guharanira imibereho myiza y’abaturage ntabwo zakorwa hatitawe ku muryango kuko ari yo soko y’ibikorwa byose, Nelly Kandatwa ni umukozi wa Pro Femme Twese Hamwe, yemeza ko imbaraga zikwiye gushyirwa mu kubungabunga umuryango cyane cyane umugore dore ko ibyo mu rugo byose usanga bibazwa umugore, bityo ngo kumuteza imbere ukamuha ubushobozi bikemura ibibazo byinshi bigendanye n’imibereho myiza.
Muvunyi Roben ni umukozi wa ADRA Rwanda, yemeza ko hari ibibazo bidakemuka kuko abafatanyabikorwa batahuje imbaraga,
Yakomeje agira ati: “Icyo twaganiriye ni uko buri muryango wahuza imbaraga n’abandi ibyo bibazo tukabikemurira hamwe.”
Ubuyobozi bw’Akarere ka Kirehe bwemeza ko bwamanutse bukagera mu masibo n’imidugudu basanga inzu zikenewe kubakwa ni 195 ku badafite inzu zo kubamo, izikwiye gusanwa ari inzu 303, naho abakeneye ubwiherero ni 133.
