Abaturage bo Karere ka Kirehe mu Murenge wa Mahama basabwe gutera ibihingwa byera vuba mu rwego rwo kwirinda inzara bagakoresha uburyo basanzwe bahingamo mu gihe ibyanya bibiri byuhirwa biri gutunganywa.
Kuri uyu wa 01 Werurwe 2023 nibwo Umuyobozi w’Ikigo cy’Igihugu gishinzwe ubuhinzi n’ubworozi (RAB) n’ ubuyobozi bw’Akarere ka Kirehe basuye ahari ibikorwa byo kubaka ibyanya byuhirwa biherereye mu Murenge wa Mahama umwe mu mirenge yajyaga ikunda guhura n’izuba ryangiza imyaka y’abaturage.
Umuyobozi wa RAB, Dr Rutikanga Alexandre ubwo yageraga aho ibi byanya biri kubakwa yarebye aho ibikorwa bigeze, anasaba ko ibikorwa byo kubaka byakihutishwa mu rwego rwo kongera umusaruro uturuka ku buhinzi bukorerwa muri aka Karere.
Umuyobozi w’Akarere wungirije ushinzwe iterambere ry’ubukungu , Nzirabatinya Modeste yavuze ko abahinzi bakwiye gukoresha uburyo busanzwe mu gihe ibyanya byombi biri gutunganywa ngo bajye buhirira imyaka yabo.
Yagize ati:” Biriya byanya biracyari gukorwa ntabwo birarangira, abaturage turabasaba gutegereza imirimo iri gutangira, abahinzi babe bakoresha uburyo busanzwe bahinga kuko igihe cyo kuhirwa kitaragera ariko ibikorwa biri gukorwa kandi vuba bizaba birangiye.
Bamwe mu baturage baganiriye na MUHAZIYACU bavuze ko baramutse babonye uko buhira imyaka yabo bakweza umusaruro wisumbuyeho kurusha uwo babona.
Nsengiyumva Thomas yagize ati:”nk’ubu ndahinga ariko iyo imvura yabuze usanga umusaruro mbona uba udafatitse rero abubaka baramutse bihutishije ibikorwa tukabona uko twuhirira imyaka yacu twakweza umusaruro mwinshi tugatana n’inzara.
Nyiransekanabo Verena nawe ati:”Hari igihe duhinga ntibyere kubera izuba, amazi naboneka nshobora no kweza imifuka icumi mu karima kanjye.”
Akarere ka kirehe karimo ibyanya byuhirwa birindwi habariwemo ibyanya bibiri biri kubakwa Murenge wa Mahama aho amazi azifashishwa azaturuka ku mugezi w’Akagera, ibi byanya kuri ubu byuhira hegitari ibihumbi 15.
