Umuyobozi w’Akarere ka Kirehe wungirije ushinzwe imibereho myiza y’abaturage Mukandayisenga Janvière yasabye abanyeshuri bo muri GS Nyakarambi mu Murenge wa Kirehe kwiga bashyizeho umwete, kwirinda ibiyobyabwenge; by’umwihariko abakobwa abasaba kwirinda ababashuka bakabatera inda z’imburagihe.
Ni ibikubiye mu mpanuro yatanze uyu munsi ku wa 13 Gashyantare, mu gikorwa cyo gufungura ku mugaragaro ubukangurambaga bwo kurwanya ibiyobyabwenge n’inda ziterwa abangavu barimo n’abanyeshuri; cyatangirijwe ku rwunge rw’amashuri rwa Nyakarambi, ikigo gifite amashuri abanza n’ayisumbuye.
Umuyobozi w’Akarere ka Kirehe wungirije ushinzwe imibereho myiza mu karere ka Kirehe Mukandayisenga Janvière yibukije abanyeshuri ko bagomba kwitwararika mu byo bakora birinda gukoresha ibiyobyabwenge kuko biri mu byangiza ubuzima n’imitekerereze muri rusange.
Yagize ati: “Rubyiruko murabizi Akarere kacu n’igihugu cyacu tubitezo umusaruro mwiza mu gihe kizaza, iyo abana bato nkamwe mwishora mu biyobyabwenge; mukanywa inzoga, mukanywa itabi mujye mumenya ko muri kwiyangiriza ubwonko, ubwonko iyo bumaze kwangirika n’imitekerereze iba yangiritse, mwirinde rero mukiri bato kugira ngo mukomeze kugira imitekerereze mizima kandi mushyire umwete mu masomo muhabwa hano ku ishuri.”
Agaruka ku kibazo cy’inda ziterwa abangavu Mukandayisenga yasabye abangavu biga muri iki kigo kwirinda ababashukisha ibirimo n’amafaranga bakabatera inda; ashimira kandi ubufatanye itorero rya “Assamble de Dieu” mu kurandura iki kibazo.
Ati: ”N’abana b’abakobwa mukwiriye kwirinda abagabo n’abasore babi babashukisha amafaranga, babasezeranya ibintu byiza ahazaza hanyu, nyamara ari ukugira ngo babangirize ubuzima.”
Bamwe mu banyeshuri bo mu Kigo cya GS Nyakarambi MUHAZIYACU yaganiriye nabo bagarutse ku byo bigiye muri ubu bukangurambaga.
Nikuze Yvette yagize ati: ”Njyewe ikintu nigiye muri ubu bukangurambaga ni ukujya nirinda abagabo n’abasore bashukisha abana b’abakobwa amafaranga bakabajyana mu ngeso mbi z’ubusambanyi, bakaba banahandurira Virusi itera SIDA cyangwa bakabatera inda kandi bagifite urugendo rwo kwiteza imbere.”
Habimana Léonidas na we ati: ”Ibiyobyabwenge biri mu bintu byugarije urubyiruko cyane nk’uko umuyobozi yabitubwiye ngomba kwirinda iyi ngeso mbi aho nzajya hose, kandi nzi ko ngomba no gushishikariza urundi rubyiruko turi mu myaka imwe kwirinda iyi ngeso kuko ituma imitekerereze y’ejo hazaza yangirika bigatuma n’iterembere umuntu yifuza atarigeraho.”
Mukandamage Odette, umwe mu barezi muri GS Nyakarambi avuga ko ari ingenzi kuba ubuyobozi bwaratekereje ubukangurambaga bwo kwirinda ibiyobyabwenge n’inda abana b’abangavu batwara biturutse ku burangare n’ubushukanyi abanyeshuri bahura nabwo.
Ati: ”Nishimiye cyane ko ubuyobozi bw’Akarere ka Kirehe bukomeje gushyiraho itafari mu kurwanya ikibazo cy’abana b’abangavu baterwa inda ndetse na bamwe mu bishora mu biyobyabwenge, mu byo dutangamo amasomo mu ishuri natwe dushishikariza abanyeshuri bacu ko bagomba kwirinda ingeso mbi zose kugira ngo bazabashe gutegura neza ejo hazaza habo.”
Ubukangurambaga bwo kwirinda ikoreshwa ry’ibiyobyabwenge n’inda zitwarwa n’abangavu biteganyijwe ko buzakomereza mu mirenge 12 igize aka karere ka Kirehe; ubwa none muri GS Nyakarambi Akarere kabukoze ku bufatanye n’Itorero Assemblées de Dieu.
