Umuyobozi w’Urugaga rw’abagore rushamikiye ku muryango wa FPR Inkotanyi mu karere ka Kayonza Mukankusi Flavia yemeza ko binenze ku mbaraga nke bakoresha mu gufasha imiryango ifitanye amakimbirane mu miryango
Kuri uyu wa 13 Ugushyingo mu murenge wa Mukarange hateraniye inteko rusange y’abayobozi b’urugaga rw’abagore rushamikiye ku muryango FPR Inkotanyi guhera mu tugari kugeza ku rwego rw’Akarere, aho bagaragarijwe ibyakozwe mu myaka ibiri ishize.
Iyi nteko rusange yaranzwe no gusasa inzobe ko mikorere ya bamwe mu bagize urugaga rw’abagore rushamikiye ku muryango FPR Inkotanyi mu midugudu, n’utugari badatangira raporo igihe, ariko bigeze ku kibazo cy’amakimbirane mu miryango gikomeje gufata indi ntera dore ko gifatwa nk’ishingiro ry’ibindi bibazo byibasiye umuryango nyarwanda birimo, imirire mibi, umwanda, ubukene.
Mukankusi Gakwaya Flavia Perezidante w’Urugaga rw’abagore rushamikiye ku muryango FPR Inkotanyi mu karere ka Kayonza kuri iyi ngingo yagize ati: “Hari aho urugaga n’abagize inama y’igihugu y’abagore badahuza mu rugamba rwo gufatanya gukemura amakimbirane mu miryango, mu gukemura ibi bibazo ntaho turagera ahubwo hakenewe imbaraga nyinshi zituruka hirya no hino ibibazo birahari muri buri mudugudu muri buri kagari, gusa turagerageza gukora kandi ubu hari imiryango twafashize kwiyunga”
Muri iyi nteko hari umwe mu banyamuryango ba FPR Inkotanyi ubwo bunguranaga ibitekerezo kuri iyi ngingo wagize ati: “Mureke twinenge turebere hamwe icyo dukwiye gukora ku kibazo cy’amakimbirane mu miryango, hasi hariya mu mudugudu twese niho tuba nk’abanyamuryango dukora iki ngo dufashe iyo miryango kuva mu makimbirane? Habura iki se? Kuki aho dutuye tukibona imiryango ifashwa kuva mu makimbirane ikiri micye? Twese dukwiye guhaguruka tugafatanyiriza hamwe.”
Hari umwe mu miryango wa Twahirwa Evariste na Mukamugema Francine wafashwijwe n’urugaga rw’abagore rushamikiye ku muryango FPR Inkotanyi muri Mukoyoyo mu murenge wa Rwinkwavu, wemeza ko ingufu ziri mu mudugudu hasi zidakoreshwa nk’uko bikwiye ngo imiryango ifite amakimbirane ifashwe kuyakemura.
Twahirwa yagize ati: “Ziriya nzego z’abagore ziri hasi mu mudugudu ntabwo zikemura ibibazo neza, bagomba kongera imbaraga kuko amakimbirane aracyahari bagomba kongera imbaraga bagakemura ibibazo hakiri kare abantu bataricana.”
Umugore we Mukamugema na we yagize ati: “Imbaraga zikwiye gushyirwa mu muco w’abanyarwanda, Umugoroba w’ababyeyi uguhabwa imbaraga cyane, ugakorwa n’abantu bafite ubunyangamugayo kugira ngo bafashe gusana umuryango nyarwanda, dukeneye ko abana n’ababyeyi baganirizwa ku mwihariko wa buri muryango noneho bose bakagira ihuriro, bakicara bagacoca ibibazo biri mu muryango.”
Chairman w’Umuryango FPR Inkotanyi mu karere ka Kayonza Nyemazi John Bosco wari witabiriye iyi nteko, yemeza ko ku kibazo cy’amakimbirane mu miryango hari umwanzuro bafashe,
Ati: “Abagize urugaga bafashe ingamba baniyemeza ko bagiye kureba imiryango ibana mu makimbirane, bakabanza bakayimenya ku rwego rw’umudugudu, hakabaho imikoranire y’inzego haba Urugaga rw’abagore zaba n’izindi nzego tugafatanya kugira ngo biriya bibazo byo mu miryango bikemuke.”
Bimwe mu byakozwe muri iyi myaka ibiri ishize byamurikiwe abanyamuryango ba FPR Inkotanyi bari mu nteko y’abagize urugaga rw’abagore rushamikiye ku muryango FPR Inkotanyi, harimo imiryango 155 yafashijwe gukemurirwa amakimbirane, naho ibibazo 35 biracyakurikiranwa n’abagore; mu gihe hari ibibazo biri mu miryango 14 biri gukurikiranwa n’izindi nzego.
