Umusore w’imyaka 18 witwa Manizabayo Valens wari utuye mu Kagari ka Rusera mu Murenge wa Kabarondo mu Karere ka Kayonza, yasanzwe mu nzu yabagamo yapfuye bigakeka ko yiyahuye akoresheje umuti bakunze gutera inyanya uzwi nka Rava.
Ibi byamenyekanye mu gitondo cyo kuri uyu wa gatatu, tariki 07 Nyakanga, nyuma y’aho Mukansanziki Grace usanzwe ari nyina wabo w’uyu musore agiye gufata amajerekani yo kujya kuvoma, akomanze ntihagira umwitaba ngo kandi urugi rufungiyemo imbere, niko gushaka uko bica urugi basanga yapfuye.
Umuyobozi w’Umurenge wa Kabarondo, Kagabo Jean Paul aganira na MUHAZIYACU yavuze ko bagiyeyo n’izindi nzego z’umutekano zirimo RIB na Polisi basanga koko yapfuye, gusa ngo mu igenzura ryakozwe basanze iruhande rwe hari agacupa k’umuti bita rava usanzwe ukoreshwa mu buhinzi bw’inyanya aho wica udukoko.
Ati: “Uwo muti turakeka ariwo yanyweye ukaza kumwica kuko wanabonaga ko asa n’uwabanje kuruka, twahise tumwohereza ku bitaro bya Rwinkwavu kugira ngo bamukorere isuzuma bakazatubwira icyamwishe.”
Kagabo yakomeje avuga ko uyu musore w’imyaka 18 yari yaragerageje kwiyahura izindi nshuro ebyiri ariko akagenda atabarwa, bimwe mu byo ngo yavugaga byabimuteraga ni uko ngo iwabo bamwanga.
