Imibare igaragaza ko mu Ntara y’Iburasirazuba ubwitabire muri gahunda za Ejo Heza n’ubwisungane mu kwivuza (Mituweli) bukiri bucye ugereranyije n’izindi ntara, bamwe mu bayobozi b’inzego z’ibanze biyemerera ko muri ubu bukangurambaga hadakoreshwa imbaraga nkuko bikwiye.
Intara y’Iburasirazuba iri ku mwanya wa kane mu bwitabire bwa Ejo Heza, ni ukuvuga ko ibanziriza iya nyuma mu bwitabire bwa Ejo Heza, naho muri mituweli hari uturere twageze kuri 90% utundi tukiri kuri 60%.
Ibi bituma muri iyi minsi hatangiye gutekerezwa uburyo bwo kongera imbaraga mu bukangurambaga nkuko byemezwa n’umuyobozi w’Intara y’Iburasirazuba Mufulukye Fred, ubwo yari mu karere ka Ngoma kuri sitade nshya, aho yaganiriye n’abayobozi kuva ku mudugudu kugeza ku karere.
Guverineri Mufulukye yabisobanuye ko ku birebana na Mituweli na Ejo Heza ari ibikorwa bisaba ko abaturage babyitabira cyane, iyo bisuzumye babona mituweli hari intera ishimishije bamaze kugeraho nubwo abaturage bose batarajya muri mituweli.
Muri Ejo Heza uturere tugize Intara y’Iburasirazuba turi hagati ya 25% na 30% by’ubwitabire.
Guverineri Mufulukye akomeza avuga ko batangije ubukangurambaga buhwitura abayobozi kurushaho kwegera abaturage bakitabira izi gahunda za leta.
Yunzemo agira ati: “Twaje kugirango twongere tubakangurire kurushaho kwigira ku bandi, kandi batwijeje ko mu kwezi kwa 10 hari aho bazaba bageze.”
Bamwe mu batungwa agatoki ko badakora neza ubukangurambaga ni abanyamabanga nshingwabikorwa b’imirenge n’utugari, nabo biyemerera ko hari aho ubukangurambaga budakorwa neza.
Niyigena Alexis ni umwe muri aba bagitifu, ayobora umurenge wa Mugesera, muri Ejo Heza ari ku kigero cya 44% naho muri mituweli bageze kuri 81%. Yemeza ko ibi bikorwa bisaba ubukangurambaga buri hejuru cyane.
Ibi ngo bigaragazwa n’uko hari utugari tubiri wasanga duturanye ariko tutari mu murenge umwe, hamwe bafite igipimo kiri hejuru abandi bari hasi.
Yakomeje agira ati: “Muri ziriya gahunda za Ejo Heza na mituweli iyo uri umukangurambaga mwiza ibintu birazamuka.
Ubukangurambaga burakomereza mu tundi turere kugirango abaturage barusheho gushishikarizwa kwitabira gutangira mituweli igihe ndetse no kurushaho kwizigamira muri Ejo Heza.
