Mukantaganda Jeanne w’imyaka 35 uherutse gupfusha umugabo, ni umubyeyi w’abana babiri utuye mu Murenge wa Mayange mu Karere ka Bugesera, ashimira ubuyobozi bw’Igihugu ndetse n’abaturage ku gikorwa bamukoreye cyo kumushyikiriza inzu yubakiwe n’Itorero ADEPR Paruwasi ya Bugesera, mu rwego rwo kubakira imiryango itishoboye yarokotse Jenoside yakorewe Abatutsi.
Igikorwa cyo gushyikiriza Mukantaganda Jeanne inzu yubakiwe n’aba kristu ba ADEPR Paruwasi Bugesera, cyabaye kuri uyu wa Mbere tariki 04 Kanama 2026 mu Kagari ka Kibenya mu Murenge wa Mayange.
Ashimira abagize uruhare mu kumwubakira iyi nzu, Mukantaganda yagaragaje amarangamutima yo kubona inzu atari yiteze ngo kuko umugabo we yapfuye batarabona aho kuba.
Ati: “Ndashimira Igihugu cyacu kuko gifite imiyoborere myiza ituma tugira umutekano noneho abantu bagashobora kubaka inzu nk’iyi. Ndashimira kandi Itorero ADEPR ryagize neza rinyubakira aho kuba n’umuryango wanjye. Mu by’ukuri ntabwo byari binyoroheye kubona umugabo wanjye yitabye Imana kandi ducumbitse, ariko nagize umugisha mbona aba Kristu ba ADEPR banyubakira inzu nziza.”
Umushumba w’Itorero ADEPR mu Ntara y’Iburasirazuba, Pasiteri Bizimana Jean Baptiste, yashimiye aba kristu ba ADEPR Bugesera ku gikorwa cyo kubakira umuturage akabona aho kuba. Yibukije aba kristu ko buri wese akenera iterambere rya roho n’iterambere ry’umubiri.
Yagize ati: “Ni byiza ko tuvuga iterambere ryuzuye; iry’umwuka n’iry’umubiri nka ya mvugo ko roho nzima utura mu mubiri muzima. Byombi rero bigomba kuba byuzuzanya. Umuntu akenera iterambere ry’umubiri ndetse n’irya roho. Rero iyo kimwe kibonetse ikindi ntikiboneke, ikindi gitakaza agaciro.”
Yakomeje agira ati: “Mu by’ukuri ugize gukiranuka Imana ikagufasha ukaba warizeye Yesu Kristu nk’umwami n’umukiza mu bugingo bwawe, ukabaho ukiranuka, wirinda icyaha n’igisa nacyo ariko ntubone ibyo kurya, ntubone umwambaro,… kwa gukiranuka kumera nk’aho gutakaje agaciro.”
Umuyobozi w’Akarere ka Bugesera wungirije ushinzwe imibereho myiza y’abaturage, Imanishimwe Yvette yagaragaje ko kubakira umuturage ari igikorwa cy’ingenzi, ashimira Itorero ADEPR n’aba kristu bayo bubakiye inzu umuturage utishoboye.
Ati: “Aba kristu, ndashima uruhare bagize. Ibi nibyo bita ubumuntu. Turashima cyane ADEPR uburyo yakoze iki gikorwa cyo kubakira umuturage bagendeye ku muntu ubabaye kuruta abandi batagendeye ku myemerere ngo barebe mu bakristu babo. Uyu wubakiwe asengera muri EAR ariko akaba yarubakiwe na ADEPR. Rero ni ikigaragaza ubuyobozi bwiza kuko udafite ubuyobozi bwiza ntabwo amadini n’amatorero yaba afitanye ubumwe bugeze aha.”
Iyi nzu Mukandaganda Jeanne yubakiwe yuzuye itwaye arenga miliyoni 12 frw.
