Guverineri w’Intara y’Iburasirazuba GG Gasana K. Emmanuel yasabye abaturage kutirara muri ibi bihe by’iminsi mikuru ya Noheli n’Ubunani, ahubwo bakubahiriza ingamba zashyizweho zo kurwanya icyorezo cya Covid-19.
Ibi CG Gasana yabitangaje mu kiganiro n’abanyamakuru cyabaye kuri uyu wa 22 Ukuboza, cyari kigamije kwerekana aho Intara y’Iburasirazuba igeze mu kurwanya icyorezo cya Covid-19, aho yibukije ko ibi ari ibihe bidasanzwe.
Yakomeje agira ati: “Iki ntabwo ari igihe cyo gukora ibyo ushaka byose, tumaze kubibona abantu bafatirwa mu bitaramo bidasobanutse, banyuranyije n’amabwiriza yo kurwanya Covid-19, ibyo ntabwo ari byo, ibi birakomeye cyane kuko ari ugukwirakwiza icyorezo kandi bihenze igihugu.”
Ubu butumwa bwagarukaga cyane ku buryo abaturage bo mu Ntara y’Iburasirazuba bakwiye kwitwara dore ko muri ibi bihe hari iminsi mikuru ya noheli n’ubunani ishobora gutuma habaho kwica amabwiriza bitewe n’ubusabane nyamara ibyo bitemewe mu rwego rwo gukumira ikwirakwira ry’ubwandu bwa Covid-19.
Kuva mu kwezi kwa Werurwe 2020, mu Ntara y’Iburasirazuba abamaze kwandura Covid-19 ni 38,234 naho abarwaye ubu ni 159, abitabye Imana bazize iki cyorezo ni 251 ni imibare yo kugeza mu kwezi k’Ugushyingo 2021.
