Mu Karere ka Gatsibo, mu myaka itanu ishize kuva muri 2021-2026 hubatswe imihanda ya kaburimbo ingana na kilometero 63.3, mu bikorwa byibanda ku guteza imbere ibikorwaremezo no korohereza abaturage ingendo n’ubuhahirane.
Muri icyo gihe cy’imyaka itanu kandi, imihanda ifite uburebure bwa kilometero 53 yashyizwemo laterite iratsindagirwa, hanubakwa ibiraro bigera kuri 16 harimo ikiraro cya Kabacuzi n’ikiraro cya Mayange byombi byuzuye bitwaye ingengo y’imari ingana na miliyoni 600 z’amafaranga y’u Rwanda.
Hubatswe umuhanda wa kaburimbo wa Muhura–Gasange–Njume–Kiramuruzi, ufasha mu guteza imbere imihahirane n’ingendo ku batuye mu Mirenge ya Muhura, Gasange, Kiramuruzi, ndetse n’uduce bihana imbibi. Hubatswe kandi ibiraro bitandukanye birimo ikiraro cya Ntende mu Murenge wa Rugarama, ikiraro cya Mayange mu Murenge wa Nyagihanga, ndetse n’ikiraro cya Kabacuzi, gihuza Umurenge wa Muhura n’Umurenge wa Nyagihanga.
Umuyobozi w’Akarere ka Gatsibo, Gasana Richard, yashimiye uruhare rw’abaturage mu bikorwa byo kwiyubakira ibikorwaremezo, abasaba gukomeza ubwo bufatanye mu rwego rwo kugira uruhare mu iterambere ry’Igihugu.
Ati: “Ibyo dukora tubifatanya n’abaturage kandi bigaragaza imbaraga n’uruhare abaturage bagira mu kubaka ibikorwaremezo kandi bakabirinda kugira ngo bitangirika, kuko ibibazo tuba dufite tugomba kubishakira ibisubizo kandi ibisubizo nta handi biva uretse mu mbaraga z’Abanyarwanda.”
Muri gahunda y’ibikorwa by’Akarere ka Gatsibo y’imyaka itanu 2024-2029 , hateganijwe kubakwa indi mihanda itandukanye irimo umuhanda wa Bukomane- Nyarukoni uhuza Akarere ka Gatsibo n’umuhanda munini wa Nyagatare-Gicumbi, hazubakwa umuhanda wa Ndatemwa-Muhura-Burimbi uhuza Akarere ka Gatsibo na Gicumbi, ndetse kandi hazubakwa umuhanda uhuza Akarere ka Gatsibo na Kayonza uturutse mu isantere ya Rugarama ugaca Kanyangese ukagera Karambi, hari umuhanda kandi uzaba ufatiye ku muhanda munini uvuye Nyagahanga, ukanyura Mugisiza ukagera Rwagitima, ndetse n’imihanda y’imbere mu karere ihuza imijyi na santeri za Kabarore, Kiramuruzi, ndetse na Ngarama.
