Mu myaka ibiri iri imbere biteganyijwe ko imihanda minini ireshya n’ibirometero 631.86 izaba iriho amatara, muri gahunda yatangiye kuri uyu wa 30 Kamena, 2020.
Iyi ni gahunda yatangirijwe i Nyagasambu, mu Murenge wa Fumbwe mu Karere ka Rwamagana, ku muhanda Kigali-Rusumo.
Umuyobozi w’Akarere ka Rwamagana ushinzwe imibereho myiza y’abaturage, Umutoni Jeanne, yavuze ko iki gikorwaremezo kizafasha guhindura imibereho n’imikorere y’abaturage.
Yagize ati: “Ni kimwe mu bintu twabonaga byaburaga kuri uyu muhanda utuwe n’abantu benshi, bakora amasaha menshi, haburaga urumuri rusange ku mihanda.”
Umutoni yanavuze ko uburyo bwo kwicungira umutekano buzarushaho koroha kubera hari urumuri.
Muhimpundu Beatha utuye mu Murenge wa Fumbwe, Akagari ka Nyakagunga, Umudugudu w’Akabeza, yagize ati: “Twahuraga n’imbogamizi, nkatwe dukorera muri ririya soko, twagendaga mu kizima, tukagenda twikanga umuhanda wose ko nta mutekano uhagije. Ariko ubu turishimye pe. Iki ni igikorwa cy’indashyikirwa.”
Dufatanye Cancilide, utiye mu Murenge wa Fumbwe, Akagari ka Nyakagunga, Umudugudu wa Kabeza, yemeza ko amasaha yo gukora aziyongera igihe amatara azaba yaka ku mihanda.
Ati: “Imbogamizi ntizabura, kuko nkanjye nkora mu isoko, twatahaga kare kubera ko hatabona kubera impungenge z’umutekano muke.”
Ndanga Emmanuel niwe mukozi wa REG ushinzwe kuzakurikirana umushinga wo gushyira amatara kuri iyi mihanda, yavuze ko amatara azashyirwa kuri iyi mihanda azashyirwaho ikoranabuhanga rishyashya ku buryo hazabaho uburyo bworoshye bwo kuyagenzura.
Yasobanuye ko ari amatara ubwayo azajya agena ingano y’urumuri bitewe n’igihe rukenewe.
Ati: “Igihe hakenewe ko yaka cyane azajya yaka cyane azajya yaka cyane, aho bikenewe ko gaka gakeya bikaka gakeya.”
Asoza avuga ko ari umushinga munini uzakorera mu bice byose by’igihugu, ngo icyo basaba abaturage ni ukuzabibungabunga.
Avuga kandi ko hari aho bizasaba kwimura abaturage, cyane cyane mu kugeza amashanyarazi kuri aya matara, akaba abasaba ko bakorana neza.
