Abaturage 54 bo mu Murenge wa Muhura mu Kagari ka Gakorokombe mu Karere ka Gatsibo bafatiwe mu birori by’ubukwe bakoze mu buryo butemewe kuko barenze ku mabwiriza yo kwirinda icyorezo cya Covid-19.
Mu Mudugudu wa Kinihira mu Kagari ka Gakorokombe niho habereye imihango yo gusaba no gukwa, ibera mu rugo rw’umuturage, bubaka ibisharagati, muri ibi birori hari hateraniye abantu barenga 100 bari baje gucyuza ubukwe.
Nkuko byemezwa n’Umunyamabanga Nshingwabikorwa w’Umurenge wa Muhura Rugengamanzi Steven, aya makuru bayabwiwe n’abaturage, babwira ubuyobozi ko hari abantu bakoresheje ubukwe mu mudugudu wabo, abayobozi bageze aho hantu basanga koko hari ubukwe bamwe bariruka hafatwa 54.
Gitifu Rugengamanzi yakomeje agira ati: “Twabimenye turi mu nama abayobozi bajyayo bahafatira abantu 54, abandi bariruka, abo twabajyanye ku kagari baraganirizwa bishyura amande barataha.”
Amabwiriza y’inama njyanama y’Akarere ka Gatsibo ku bantu batubahiriza amabwiriza yo kwirinda Covid19 ateganya ko umuntu witabiriye ubukwe mu gihe butemewe acibwa amafaranga ibihumbi 10, naho uwabukoresheje agacibwa amande y’amafaranga ibihumbi 100.
Ubuyobozi bwo mu Murenge wa Muhura bwemeza ko ari ubwa mbere muri uyu murenge hafashwe abaturage bakoresheje ibirori batubahirije amabwiriza yo kwirinda icyorezo cya Covid-19.
