Umuyobozi w’Akarere ka Ngoma, Niyonagira Nathalie avuga ko hagiye kubakwa ifoto y’ikibumbano ahazwi nka Rompuwe(Round point) mu rwego rwo kugaragaza ko umuntu yinjiye mu Karere k’igicumbi cy’ubuhinzi, ubworozi n’ubukerarugendo.
Iki kibumbano biteganyijwe ko cyizashyirwa mu bikorwa mu mwaka utaha muri Nyakanga 2024 cyikazashyirwa ahazwi nko ku byapa bya Round Point mu murenge wa Kibungo.
Kizaba kigizwe n’ibihingwa ndangakarere nk’inanasi, urutoki, ubukerarugendo, n’ ubworozi bw’inka nka bimwe mu bitanga umusaruro mwiza kandi mwinshi ku rwego rw’Igihugu; ku mpamvu z’uko ari byo kazwiho kurusha ibindi.
Umuyobozi w’Akarere ka Ngoma, Niyonagira Nathalie yavuze ko hagiye kubakwa ikirango cyerekana ko umuntu ageze mu Karere ka Ngoma mu gihe cya vuba.
Yagize ati: “Twarabitangiye ntago biri butinde muri uyu mwaka ugiye gutangira mu kwezi kwa Nyakanga turabishyira mu bikorwa kuko twari tubisanganywe, twari tukigisha inama kandi murabona ko n’imihanda yacu mu mujyi wa Kibungo yuzuye vuba cyane; yari nagikorwa ntago twashoboraga kubikora ariko ubwo yuzuye natwe n’ikintu kihutirwa cyane tugomba kuba twagezeho vuba.”
Ubwo Guverineri w’Intara y’Iburasirazuba CG Gasana K.Emmanuel yasuraga Akarere ka Ngoma yakagiriye inama yo gushyiraho igishushanyo cyiranga koi winjiye muri aka Karere kigizwe n’ibyo kazwiho agende ku gishushanyo yarabonye kiri mu nzu mberabyombi y’Akarere ka Ngoma.
Yagize ati: “Nk’icyi gishushanyo uwagishyira kuri Round point haricyo bitwaye?, wenda hariya hari imisozi y’ibirunga mukahashyira amazi umuntu agashyiramo ubwato, Inka nazo zikororerwa mu kiraro, inanasi zikaba nyinshi n’igitoki, […] Murabyumva gute? haricyo bitwaye duhere aha ngaha dukosora cyangwa tunoza.”
Akarere ka Ngoma gaherereye mu Ntara y’Iburasirazuba gafite ubuso bungana na 867.74 Km2, kakaba gatuwe n’abaturage ibihumbi 404 ndetse ingo 102,589 zitunzwe n’ubuhinzi butandukanye nk’uko biherutse kugaragazwa n’ibarura Rusange ryo mu 2022.
