Urubyiruko rwo mu Murenge wa Nyagihanga mu Karere ka Gatsibo rugera kuri 75 bari bamaze igihe cy’amezi arenga atandatu bahabwa amasomo yo kwiga kudoda ndetse no gukanika, basoje amasomo yabo bahabwa ibikoresho bifite agaciro karenga amafaranga miliyoni 30.
Ibi byose byagizwemo uruhare n’umuryango Food For The Hungry ku bufatanye n’ubuyobozi bw’Akarere ka Gatsibo.
Umuyobozi w’Akarere ka Gatsibo, Gasana Richard, mu gikorwa cyo gushyikiriza impamyabumenyi ndetse n’ibikoresho kuri uru rubyiruko rwasoje aya masomo yo kudoda n’ubukanishi yavuze ko ari gahunda bakesha ubuyobozi bwiza bw’igihugu.
Umuyobozi w’Akarere Gasana Richard yagize ati: “Iyi ni gahunda y’igihugu yo guhanga imirimo ndetse no gutanga ubumenyi, bikaba biri muri gahunda ya Nyakubahwa Perezida wa Repubulika y’imyaka itanu ndetse n’irindwi dusoje, Food for the Hungry ikaba yaraje nk’umufatanyabikorwa wo gushyira mu bikorwa iyo gahunda.”
Yakomeje agaragaza ko uru rubyiruko rugiye kwiteza imbere ndetse no guteza imbere imiryango yabo, gusa ashimangira ko bazakomeza kubaba hafi no mu minsi iri imbere.
Ati: “Icyo dukomeza gukora ndetse n’umufatanyabikorwa ni ukugira ngo aba bana tutabarekura, ntabwo basoje ngo umuntu afate imashini ye atahe undi afate tool box irimo ibyuma bikanika ngo atahe, oya, twanabiganiriye tugiye kureba uburyo tubabumbira hamwe kuko n’ubundi nibyo bigishijwe, akaba ari n’umuco mwiza wa Food for the Hungry ko abantu bafashijwe bose babumbirwa hamwe, abakanishi tugiye kubabumbira hamwe tumenye aho bajya gukorera n’abadoda babumbirwe hamwe, ikindi ariko ntabwo dusoje kubafasha, ni ukubaba hafi tubereka ko igihugu kibakunda tubereka ko ubumenyi bahawe bazahabwa n’ubundi.”
Uwitije Cyprien, uyobora Food For The Hungry ishami ry’u Rwanda avuga ko mu byo bakora harimo no guhindura mu buryo bwuzuye imibereho y’Abanyarwanda aho kuri ubu bari kwita ku guteza imbere urubyiruko ruhabwa amasomo y’ubumenyingiro bigendanye na gahunda y’igihugu.
Agira ati: “Twebwe nka Food for the Hungry ibyo dukora byose tubikora tugendeye ku cyerekezo cy’igihugu, hariho rero gahunda yo guteza imbere urubyiruko ruhabwa ibirufasha kugira ngo rwiteze imbere kandi rubashe guhindura ubukungu bw’igihugu.”
Akomeza avuga ko mu gihe bamaze bakorera mu Karere ka Gatsibo by’umwihariko mu Murenge wa Nyagihanga, bamaze guhidura ubuzima bwa benshi bari bari mu bwigunge baterwaga n’ubukene.
Ati: “Muri Nyagihanga tumazemo imyaka igera muri irindwi kandi tumaze gukoramo ibikorwa bitandukanye, uyu munsi turimo turishimira ibi ngibi ariko sibyo byonyine dufite, dukora mu burezi, dutanga ibikoresho by’ishuri, dufasha abarimu kugira ngo banoze imyigishirize. Mu mwaka ushize dufite itsinda ry’abagore bize ubudozi kuri ubu bamaze kwiteza imbere ku buryo bafite umutungo ubarirwa muri miliyoni 10 mu byo tubafashamo tubaha n’amasoko bakiteza imbere.”
Food For The Hungry ni umuryango utegamiye kuri Leta ukorana na Leta mu bikorwa bitandukanye byo gihindura imibereho y’Abanyarwanda mu buryo bwuzuye. Ukaba ukorera mu turere turindwi hano mu Rwanda.
