Umuyobozi w’Akarere Ka Gatsibo wungirije ushinzwe imibereho myiza y’abaturage Mukamana Marceline asaba urubyiruko ruri muri gahunda y’Intore mu biruhuko kwirinda ibiyobyabwenge birimo n’inzoga zitujuje ubuziranenge kugira ngo bazasubire ku ishuri ari bazima bashobore gutanga umusaruro ababyeyi n’Igihugu babategerejeho.
Visi Meya Mukamana uherutse gusura urubyiruko kuri site ya Ngarama mu Murenge wa Ngarama, yarukanguriye kwirinda ibiyobyabwenge no kutishora mu ngeso mbi.
Yagize ati: “Icyuma oya, ibiyobyabwenge mu rubyiruko oya, mukomeze kugira imyitwarire myiza kugira ngo muzasubire ku ishuri mwese muri bazima, by’umwihariko abana b’abakobwa muri iyi minsi muri mu biruhuko mwirinde ibishuko byatuma ubuzima bwanyu bwangirika mwibuke ko Igihugu kibakunda kandi ko kibatezeho umusaruro w’ejo hazaza.”
Bamwe mu rubyiruko rwaganiriye na MUHAZIYACU ruvuga ko gahunda y’Intore mu biruhuko bayigiramo amasomo yo gukunda Igihugu ndetse n’amateka Igihugu cyanyuzemo.
Niyibizi Daniel utuye mudugudu wa Kiyovu mu Kagari ka Ngarama, yagize ati: ” Gahunda y’Intore mu biruhuko twigiramo indangagaciro zikwiriye Umunyarwanda, twigiramo na kirazira, twigiyemo ko kizira kugambanira Igihugu, twigiyemo kwiyubaha no kubaha abandi; icyo bizamfasha ninsubira ku ishuri, bizamfasha kubana neza na bagenzi banjye twigana.”
Mu karere Ka Gatsibo urubyiruko ruri muri gahunda y’Intore mu biruhuko rugera ku bihumbi 48.
Iyi gahunda iba gatatu mu Cyumweru, ku wa Mbere, ku wa Kabiri ndetse no ku wa Gatanu, Insangamatsiko uyu mwaka iragira iti: ” Imyitwarire myiza, Ubuzima bwiza.”
