Mu Mudugudu wa Gasave mu Kagari ka Nyabisindu mu Murenge wa Kiramuruzi, umuturage witwa Muneza James yatwikiwe urutoki rwari intangarugero mu mudugudu.
Mu gitondo cyo kuwa 3 Nzeri ngo barabyutse mu gitondo basanga urutoki rwamaze gushya hanazimye.
Umuturage watwikiwe urutoki ashinzwe umutekano mu Mudugudu wa Gasave, yavuze ko babyutse bagasanga byabaye ariko batazi uwabikoze, dore ko anavuga ko ntawe bari bafitanye ikibazo muri uyu mudugudu.
Umunyamabanga Nshingwabikorwa w’Umurenge wa Kiramuruzi Yankurije Vestine yemereye MUHAZIYACU ababikoze bataramenyekana.
Ati: “Nyuma yo kugera ahabereye ikibazo twasanze koko urutoki barutwitse ariko ababikoze ntibaramenyekana uretse ko turi gushakisha uwaba yihishe inyuma y’ibi bikorwa by’ubugome.”
Yakomeje avuga ko amakuru ava mu baturage bavuga ko hari abantu bamaze iminsi babuzwa gukora utubari mu ngo mu rwego rwo kwirinda icyorezo cya Covid-19; bikaba bimaze gusa n’impamvu ituma abaturage basa n’abijunditse abayobozi kuko bababuza gukora ibyo bashaka.
Ibi kandi ngo bijya binaba intandaro y’umutekano muke muri aka kagari.
Uretse uru rutoki rw’umuturage rwatwitswe, muri aka kagari ka Nyabisindu hakomeje kuvugwamo urugomo rurimo ubusinzi no kwimurira utubari mu ngo, kurwana bagakometsanya, gusuzugura no gutuka abayobozi.
Si ibi gusa, hari umuturage uherutse gufatanwa inzoga aho yazicururizaga ahita yirwaza abeshyera umuyobozi ngo aramukubise, kandi ari amayeri yo kugira ngo agende bamureke, nk’uko uwo muturage yaje kubigaragaza mu nyandiko ibisabira imbabazi.
