Mu birori byo kwizihizwa umunsi w’Umuganura, Umuyobozi w’Akarere ka Gatsibo Gasana Richard yasabye abaturage bo mu kagari ka Kanyangese mu Murenge wa Rugarama gufata ingamba zo kongera ibyo bakora.
Umunsi w’Umuganura ku rwego rw’Akarere ka Gatsibo wabereye mu mudugudu wa Nyabubare Akagari ka Kanyangese aho abaturage basangiye bimwe mu byavuye mu musaruro w’ibyo bejeje, harimo imyumbati, ibishyimbo, umutsima w’uburo, ibinyobwa birimo amata, urwagwa n’ikigage ndetse abana bahawe n’imbuto zo kurya.
Umuyobozi w’Akarere ka Gatsibo Gasana Richard ubwo yaganiraga n’aba baturage, yagize ati: “Umunsi w’umuganura byasobanuraga kwishimira ibyamaze kugerwaho, ubu natwe turishimira ibimaze kugerwaho mu buhinzi n’ubworozi, umusaruro w’iterambere, umusaruro w’ubumenyi, umusaruro w’imiyoborere turishimira intambwe imaze guterwa; ntibirangirire aho abantu bagahiga ibyo bamaze kugeraho bagahigira ko bazabyongera, ni yo mpamvu ubu tubasaba kurushaho gukora cyane, kongera umusaruro no kunoza ibyo dukora.”
Bamwe mu baturage bizihije umunsi w’Umuganura bemeza ko buri mwaka bafata ingamba zo kongera umusaruro w’ibyo bakora nk’uko byemezwa na Munyakayanza Innocent,
Yakomeje agira ati: “Mpinga ibitoki, n’ibigori n’ibishyimbo namaze kwiyemeza kongera umusaruro.”
Mukansezera Pelagie ni umwe mu bishimira umusaruro akura mu gihingwa cy’urutoki yemeza ko ku mwero warwo buri cyumweru akuramo amafaranga ibihumbi 75, nawe yemeza ko yafashe ingamba zo kuruvugurura rukajya rumuha amafaranga menshi arenze ayo dore ko hari abandi baturage areberaho bamukuba kabiri muyo binjiza.
Umunsi w’umuganura mu Rwanda ni umunsi mukuru wo kwishimira umusaruro wabonetse mu gihugu, ni umunsi ushingira ku muco w’Abanyarwanda, uyu munsi wizihizwa ku munsi wa Gatanu w’icyumweru cya mbere cy’Ukwezi kwa Kanama buri mwaka.
