Mu Karere ka Gatsibo mu Murenge wa Kabarore ,mu Kagari ka Nyabikiri niho hubatse ikimoteri rusange, abatuye muri uyu murenge w’umujyi no mu nkengero zawo bavuga ko cyakemuye ikibazo cy’isuku nke yaharagwaga.
Abaturage baganiriye na MUHAZIYACU bavuze ko bishimira ko batagihura n’ikibazo cy’imyanda nyuma y’uko Akarere kabubakiye ikimoteri rusange imyanda yose ikusanyirizwamo.
Aba baturage bavuga ko mbere iki kimoteri kitarubakwa bari babayeho nabi kuko wasangaga babura aho bashyira imyanda, ugasanga babana nayo, ibi ngo bikaba byari imbogamizi kuri bo, ariko ubu bakaba bishimira ko iki kibazo cyakemutse.
Nzisanaho Theoneste ni umumotari ukorera mu mujyi wa Kabarore, yavuze ko iki kimoteri cyabakijije byinshi kuko wasanganga isuku idahagije, abantu batabona aho bashyira ibisigazwa by’ibyo bakoresheje .
Yagize ati: “Iki kimoteri cyaje gikenewe kuko ubu urabona ko nta kibazo cy’umwanda gihari n’ubwo bitaraba ijana ku ijana, ariko ugereranije na mbere iki kimoteri kitaraza harimo itandukaniro.
Umucuruzi ucuruza ibyo kurya (restaurant) nawe yavuze ko ubu baruhutse kuko bashakaga aho bashyira imyanda bakahabura, udafite munsi y’urugo bikaba byari ingorabahizi kubona aho yerekeza ibishingwe ariko ubu avuga ko bahabona.
Yagize ati: “Twari twaragowe, Reba nawe iibishingwe byose biva muri resitora, byari bibangamye cyane byadutezaga umwanda, washakaga aho uyerekeza wabona bikunaniye ukabirekera aho ubonye ark ubu baraza bakayitwara nta kibazo .
Ntuyahaga Jean Bosco, Umuyobozi ushinzwe isuku n’isukura mu Karere ka Gatsibo, yavuze ko iki kimoteri cyatanze umusanzu ukomeye ku isuku ihari aka kanya, kuko mbere wasangaga umwanda hirya no hino.
Yakomeje avuga ko bagikomeje ubukangurambaga ku baturage aho usanga batitabira gutanga amafaranga asabwa kugira ngo batwarirwe ibishingwe.
Yasoje asaba abaturage kubigira ibyabo bagatanga amafaranga asabwa, bakita ku isuku kuko ari yo soko y’ubuzima.
Iki kimoteri rusange gicungwa na Kompanyi “Knee Kleeners Ltd Rwanda” aho umuturage azajya atanga ikiguzi cy’amafaranga 500 ku kwezi cyo gutwara ibishingwe. Gikusanyirizwamo imyanda iturutse mu mirenge 14 igize Akarere ka Gatsibo.
Ubuyobozi bw’Akarere ka Gatsibo butangaza ko cyuzuye gitwaye miliyoni zisaga 208Frw .
