Abaturage bo mu Karere ka Gatsibo bitabiriye Inama y’Igihugu y’umushyikirano batumiwemo na Perezida w’u Rwanda, Kagame Paul, bishimiye urubuga bahawe, aho bumvise impanuro z’umukuru w’Igihugu n’ubundi butumwa, bakabasha no gutanga ibibazo n’ibitekerezo bafite.
Iyi nama y’Igihugu y’Umushyikirano muri Kigali Convention Centre, ku nshuro ya 19, yatangiye kuri uyu wa 23 Mutarama ikaba irasozwa kuri uyu wa 24 Mutarama 2024.
Ku munsi wa yo wa mbere, uretse abari i Kigali muri Convention Centre bayitabiriye ku buryo bw’imbonankubone, iyi nama yitabiriwe n’abandi mu buryo bw’ikoranabuhanga ku masite atandukanye arimo iya Burera, Gatsibo, Nyanza, Rutsiro no mu muhanga muri Pologne; bose bahawe umwanya bagatanga ibitekerezo n’ibibazo.
Bamwe mu batuye Akarere ka Gatsibo bitabiriye uyu mushyikirano babwiye itangazamakuru ko bishimiye uru rubuga bashyiriweho rwo kuganira n’Umukuru w’Igihugu, no kuba bahabwa umwanya bakavuga akabari ku mutima.
Ndayambaje Déo, Umuyobozi w’imwe mu makoperative ahinga umuceri mu Karere ka Gatsibo yagize ati: “Ni ishema ry’Igihugu kuko ubundi twumvaga umushyikirano tukumva ni gahunda y’abayobozi, bajya kuganira ibibazo by’abaturage, ariko ubu n’umuturage afite uruhare; wa wundi wo hasi w’umuhinzi afite uruhare rwo kuza kumva no kuganira ku ngamba z’igihugu no gutanga ibitekerezo, ni ibintu byiza rero.”
Ingabire Mary, umwe mu rubyiruko rw’abakorerabushake mu Murenge wa Kabarore, na we yagize ati: “Byari byiza cyane kuko twongeye kwiyibutsa inshingano zacu n’ukuntu tugiye gukomeza gukorera Igihugu n’imbaraga zacu nk’urubyiruko. Ikindi ndashimira umukuru w’Igihugu ku ruhare agira mu gukunda urubyiruko; ni byinshi yadukoreye. Turamwizeza ko tugiye gukomeza gufatanya na we, muri make byaranshimishije.”
Maniragaba Emmanuel, Umukuru w’Umudugudu w’Iramba mu Kagari ka Rubona, Umurenge wa Kiziguro na we yagize ati: “Nshimira Nyakubahwa Perezida wa Repubulika yacu Paul Kagame kuba akomeza kudufasha kwiteza imbere ndetse anadutekerezaho ku byiza byose n’igihugu ibyo gikeneye mu iterambere ryacu.”
Yanakomoje ku cyo yigiye muri iyi nama, avuga ko icyamufashije cyane ari impanuro Perezida Kagame yatanze, cyane cyane aho yavuze ko Igihugu ari icy’Abanyarwanda, badacumbitse kandi bagomba gukora batikanga.
Muri iyi Nama y’Igihugu y’Umushyikirano, Perezida Kagame yatanze impanuro nyinshi zirimo ko Abanyarwanda bakwiye gukora batekanye koko bari iwabo.
Yanabwiye amahanga ashaka ko u Rwanda rukora ibyo ashaka ko nta we uzabwiriza u Rwanda ibyo rukora,
Ati: “Iyo bigeze ku kurwanirira iki gihugu cyababaye igihe kirekire ntihagire uza gufasha, nta muntu n’umwe nkeneye gusaba uruhushya rwo gukora ibyo tugomba gukora ngo twirinde.”
Muri iyi Nama y’Igihugu y’Umushyikirano yabereye muri Kigali Convention Centre ku nshuro ya 19, abayikurikiye mu buryo bw’ikoranabuhanga bari kuri Site ya Gatsibo mu Ntara y’Iburasirazuba basaga 300.
