Abayobozi b’ibigo bibarizwa mu Karere ka Gatsibo bamaze iminsi bahabwa amahugurwa y’uburyo bazakira abanyeshuri baje kwiga hirindwa icyorezo cy’ubushita bw’inkende.
Bamwe mubayobozi b’ibigo by’amashuri baganiriye na MUHAZI YACU bavuga ko biteguye neza abanyeshuri kandi banashyizeho uburyo bwo kwirinda ko icyorezo cy’ubushita bw’inkende cyakwirakwira.
Padiri Tuyishimire Patrice uyobora ikigo cya Gituza TSS giherereye mu murenge wa Kageyo, yagize ati: “Kuri ubu turiteguye, twakoze amahugurwa ku karere yo kureba ibimenyetso ku waba abifite, natwe tugiye guhugura abarimu ndetse n’abandi bakozi ku buryo abanyeshuri nibaza dushobora kureba ibimenyetso tukabimenya, mu gihe dusanze hari ukekwa tukamwohereza ku kigonderabuzima, bakamupima bakamuvura.
Padiri Tuyishimire akomeza avuga ko kubera ko bazakira abanyeshuri baturutse hirya no hino mu gihugu, bazabanza kubasuzuma mbere y’uko bahurira hamwe mu kigo.
Ati: “Umurongo uhari, umunyeshuri azinjira mu kigo abanje gusuzumwa, mu gihe haboneka ukekwa ashyirwe ku ruhande mu gihe dutegereje ko apimwa neza hakarebwa koko niba ari yo ndwara afite.”
Ngezahabo Theoneste uyobora ikigo cya G.S Gihengeri giherereye mu Murenge wa Nyagihanga, avuga ko kugeza ubu bamaze kwitegura neza, haba mu gutanga amasomo ndetse no kwirinda icyorezo cy’ubushita bw’inkende.
Ati: “Amahugurwa twarayahawe tumaze kuyahabwa natwe duhugura abarimu kuko kino cyorezo kugira ngo cyirindwe birasaba imbaraga n’ubufatanye ntabwo ari iby’umuntu umwe, nkuko amabwiriza abivuga abana nibaza tuzajya tubanza turebe ko ntawufite ibimenyetso bigaragarira amaso, twashyizeho amatsinda y’abarimu azajya akora buri gitondo tukabanza kwakira abana turebye ko nta kibazo bafite, no mu gihe cyavuka tugahita dutanga raporo.”
Abayobozi b’akarere ka Gatsibo nabo bavuga ko batajenjetse, bari maso kandi ko biteguye gusenyera umugozi umwe ngo iki cyorezo kitazabaca murihumye.
Umuyobozi w’Akarere ka Gatsibo Gasana Richard yagize ati: “Turi gukora ubukangurambaga mu baturage tubabwira y’uko iki cyorezo gihari nubwo tugifite imibare mike cyane, ni ugufatanya ngo ikibazo kidakura ngo kibe kinini, mu byo dusaba abaturage harimo kugira isuku, ubu turi gusubizaho ibikarabiro abantu bakoreshaga mu gihe cya korona, abantu bakomeze bagire umuco wo gukaraba no gukora amasuku mu ngo ndetse n’ahantu hahurira abantu benshi.”
Uwayanduye icyorezo cy’ubushita bw’inkende agaragaza ibimenyetso birimo kuzana ibiheri ku mubiri birimo amazi kandi biryaryata, kwishima, kugira umuriro, umunaniro mwinshi, kubabara umutwe, kugira inturugunyu n’amasazi no kubyimba mu ntsina z’amatwi nk’uko byatangajwe n’ikigo cy’igihugu gishinzwe ubuzima RBC.
