Ubuyobozi bw’Akarere ka Gatsibo burakangurira abajyanama b’ubuhinzi kwegera abaturage mu midugudu bakabafasha gusobanukirwa uko babona ifumbire n’izindi serivisi z’ubuhinzi bijyanye n’ubuso bahingaho, bakanabahuza n’abacuruzi b’inyongeramusaruro abazwi nka Agro-dealers binyuze muri Sisiteme ya ‘Smart Nkunganire’.
Akarere ka Gatsibo gafite abajyanama b’ubuhinzi 602 n’abacuruzi b’inyongera musaruro basaga 80 hirya no hino mu Karere. Umuhinzi ashobora kubagana akabona ibikenerwa birimo imbuto z’indobanure, imiti yica udukoko, ibikoresho by’ubuhinzi n’ubworozi, ndetse n’ifumbire harimo Nkunganire ya Leta.
Ku bihingwa bimwe nka kawa Nkunganire igera kuri 50%. Naho umuturage ushaka ifumbire cyangwa imbuto ayibona akoresheje Smart Nkunganire yiyandikisha akanda *774#.
Mu gihembwe cy’ihinga cya 2026A, hegitari zigera ku 3,378 zihinze ibigori ku masite y’ibyanya bigega by’ibiribwa[FOBASI] yatoranijwe mu karere ahatanzwe ifumbire ya DAP kuri Nkunganire ya Leta ijana ku ijana, ibi biri mu bikorwa bya Leta bigamije kuzamura umusaruro w’ubuhinzi kugira ngo abantu bave mu gushaka kwihaza mu biribwa ahubwo batangire gusagurira isoko.
Umuyobozi w’Akarere ka Gatsibo wungirije ushinzwe iterambere ry’ubukungu Sekanyange Jean Leonard asaba abajyanama b’ubuhinzi kuba hafi y’abaturage kugira ngo babahuze n’abacuruzi b’inyongeramusaruro babereke uko binjira muri sisiteme kandi banabafashe no mu zindi mbogamizi bashobora guhura nazo.
Aragira ati: “Birashoboka ko hari abataramenya uko basaba ifumbire binyuze muri sisiteme, niyo mpamvu dufite Abajyanama b’ubuhinzi babafasha gusaba iyo fumbire bakeneye, icyo bisaba ni ukuyisaba muri sisiteme Agoronome akabyemeza, akemeza ko ifumbire isabwe ijyanye n’ubuso umuhinzi agiye guhinga, byose bigasohokera ku cyangombwa cy’umuhinzi.”
Akomeza agira ati: “Birashoboka ko ubutaka butari ubw’umuhinzi, icyo gihe hari ibyangombwa bisabwa n’inzego z’ibanze ndetse na nyir’ ubutaka akemeza ko ubwo butaka ari ubwe kandi yabutije, icyo gihe ifumbire arayibona cyangwa n’imbuto ku buryo bworoshye.”
Visimeya Sekanyange akomeza agira abahinzi inama yo kuvanga ifumbire mvaruganda n’imborera. Ati: “Ni byiza ko abaturage bacu bakoresha ifumbire mvaruganda, ariko tubagira inama yo kuyivanga n’imborera, kuko iyo ukoresheje imvaruganda gusa, hari igihe igihingwa gishya kuko imvaruganda iratwika. Icyiza ni uko babanza gushyiramo imborera, hanyuma imvaruganda ikaza nyuma kugira ngo byombi bikorane neza, abadafite ubumenyi ku buryo babigenza bagomba kugana abafashamyumvire mu by’ubuhinzi babafashe; kandi Abagoronome bacu bazakomeza kubahugura ku buryo basaba ifumbire ndetse n’imbuto.”
Bamwe mu baturage baganiriye na MUHAZIYACU bavuga ko ifumbire ibahenda kubera ko bayigurira ku giti cyabo ku giciro kiri hejuru; kuko hari abataramenya uko binjira muri Smart Nkunganire.
Munyemanzi Donati atuye mu Kagari ka Ndatemwa mu Murenge wa Kiziguro, aragira ati: “Ifumbire irahenze, mbere ifumbire ya DAP ubu turi kuyigura 920 Frw ku kilo, nta Nkunganire ya Leta mbona ndigurira ku giti cyanjye, ibya sisiteme simbizi, ariko hari ubwo baduha inkunga muri Compassion rimwe na rimwe.”
Semajangwe Faustin nawe atuye mu Murenge wa Kiziguro, aragira ati: “Ndigurira njyana icyangombwa cy’umurima kwa Agoronome ubishinzwe nkagura, ifumbire irahenze kuko ikilo cya DAP kiri kugura 920Frw naho UREE ikagura 800Frw, iyo utekereje kugura ibiro 15 usanga ari ibintu bikomeye. Simba muri Nkunganire ya Leta mbere nabagamo, ariko sinzi uko byagenze navuganye na Agoronome ambwira ko azamfasha; iyo uri muri Nkunganire birafasha kuko byorohereza umuhinzi kubona ifumbire cyangwa imbuto.”
Ubushakashatsi ngaruka mwaka bw’Urwego rw’Igihugu rw’imiyoborere (RGB) Citizen Report Card (CRC) 2025 bugaragaza ishusho y’uko abaturage babona imiyoborere n’imitangire ya serivisi mu nzego z’ibanze. Akarere ka Gatsibo kaje ku mwanya wa 9 mu kugeza serivisi zijyanye n’ubworozi ku baturage ku ijanisha rya 78.7%.
umuhinzi kwisonga