Ikipe ya Etoile de l’Est iyoboye itsinda rya mbere mu cyiciro cya kabiri, imaze gusinyisha abakinnyi batatu bashya basanzwe bakina mu cyiciro cya mbere mu rwego rwo kongera imbaraga zizatuma bazamuka mu cyiciro cya mbere.
Kuri uyu wa Kabiri tariki ya 28 Nyakanga 2020 nibwo ubuyobozi bw’iyi kipe bwasinyishije Muzerwa Amini wari usanzwe akinira Marine FC, uyu yaje yiyongera kuri Twagizimana Fabrice Ndikukazi na Ndahinduka Michelle na bo basinyiye iyi kipe mu minsi mike ishize.
Umunyamabanga mukuru wa Etoile de l’Est, Byukusenge Elia yabwiye MUHAZIYACU ko intego bafite muri uyu mwaka ari ukuzamuka mu cyiciro cya mbere.
Ati: “Amasezerano twagiranye ni ukudufasha kurangiza imikino isigaye ndetse akazanadukinira umwaka ushize, intego dufite ni ukuzamuka mu cyiciro cya mbere, ni nayo mpamvu turi kongeramo abandi bakinnyi, ubu dufite amafaranga ikipe irakomeye impande zose zishoboka ni nayo mpamvu mubona turi gusinyisha n’abandi bakinnyi bakomeye.”
Byukusenge yasabye abafana gukomeza kubaba hafi bakabashyigikira kugira ngo ikipe yabo izamuke mu cyiciro cya mbere.
Ati: “Abafana ba Etoile de l’Est bizere ko turi gukora ibishoboka byose ngo ikipe yacu izamuke mu cyiciro cya mbere, ubu abakinnyi bari gukora imyitozo ku giti cyabo twitegura imikino ya 1/4 muri Nzeri.”
Etoile de l’Est ni imwe mu makipe akinira kuri sitade iri muri eshatu Perezida Kagame yubakiye abaturage bo mu Ntara y’Iburasirazuba, izo sitade harimo iyubatswe i Bugesera, iyubatswe i Nyagatare ndetse n’iyi yubatswe i Ngoma, buri imwe ikaba yakira abantu 3500 bicaye neza.
Mu ngengo y’imari y’Akarere ka Ngoma y’uyu mwaka wa 2020-2021, ikipe ya Etoile de l’Est yagenewe amafaranga y’u Rwanda miliyoni 30.
