Urubyiruko rwo mu Murenge wa Kamabuye rugera kuri 165 ruturuka mu miryango itishoboye rwahujwe n’ibigo by’imari bitanga inguzanyo ku mishinga mito, rusobanurirwa uburyo bwo kubona inguzanyo yo gukora imishinga ibyara inyungu kugira ngo rwivane mu bukene.
Ni mu biganiro byabaye kuri uyu wa Gatatu tariki 20 Kanama 2025 byateguwe n’Umufatanyabikorwa w’Akarere SoS Children’s Villages mu rwego rwo kuzamura ubushobozi ku miryango itishoboye n’urubyiruko ruyikomokamo binyuze mu mushinga wa SoS ‘Iterambere Iwacu.
Muri ibi biganiro, Umuyobozi w’Akarere ka Bugesera wungirije ushinzwe iterambere ry’ubukungu, Umwali Angelique yashimiye Umuryango SoS ku mushinga wayo ugamije gufasha urubyiruko gutinyuka rugakora imishinga inyuranye ibyara inyungu.
Ati: “Impamvu dushimira SoS, ni uko umwaka ushize Umurenge wari inyuma muri gahunda yo kwikura mu bukene, Kamabuye yazaga ku isonga. Rero gahunda yo guhugura imiryango igera kuri 300 ndetse n’urubyiruko rurenga 160 ruyikomokamo bizadufasha kugera ku ntego yo gufasha abaturage bacu kwivana mu bukene.”
Visi Meya Umwali yasabye kandi urubyiruko rwahuguwe kubyaza umusaruro amahirwe rugenerwa.
Ati: “Aya mahirwe ntimuyafate nk’aho ari ayanyu gusa ngo muzayahorana, ahubwo muyafate nk’amahirwe mubonye mugomba gufata neza mukayabyaza umusaruro kugira ngo mutere imbere mufatanyije n’ababyeyi banyu. Mugiye guherekezwa mu gihe cy’imyaka ibiri umuryango wanyu ube uvuyemo kuko tugirana imihigo n’imiryango yanyu.”
Umuyobozi w’Umushinga Iterambere Iwacu w’Umuryango SOS, Mukeshimana Louise avuga ko guhuza urubyiruko n’ibigo by’imari bigamije kurwereka serivisi z’ibigo by’imari zigamije gufasha urubyiruko gukora imishinga ibyara inyungu.
Ati: “Guhuza urubyiruko n’ibigo by’imari bigamije kurwereka serivizi ziba muri ibyo bigo noneho rurusheho gutekereza no kunoza ya mishinga ibyara inyungu. Ibyo bibafasha kandi gukanguka ndetse bagatangira gutekereza uko babona izo serivizi kugira ngo batangiye gukora iyo mishinga. Ibyo byose biri mu biganiro bibatinyura kuba ba rwiyemezamiringo beza, bagakura amaboko mu mifuka bagakora ibikorwa bibateze imbere.”
Hakuzimana Joel wo mu Murenge wa Kamabuye, ari mu rubyiruko rwahuguwe muri iyi gahunda y’umushinga ‘Iterambere Iwacu, avuga ko muri ibi biganiro yahakuye ubumenyi n’amakuru ku birebana no gukorana n’ibigo by’imari mu buryo byo kuguzamo amafaranga yo gukora imishinga mito binyuze muri VUP igenerwa imiryango itishoboye.
‘Umushinga Iterambere Iwacu’ ugamije kwigisha no gukangurira urubyiruko n’imiryango guhindura no kuvanaho inzitizi mu mitekerereze ituma iyo miryango itagera ku iterambere rirambye.
Muri uyu mushinga, imiryango 300 n’urubyiruko 165 ruturuka muri iyo miryango nibo bazafashwa kwikura mu bukene binyuze mu kubahuza n’amahirwe akomatanyije, arimo kubafasha gukora imishinga ibyara inyungu, kwigisha urubyiruko imyuga itandukanye n’ibindi.
