Abana biga mu mwaka wa 6 w’amashuri abanza yo mu bigo byo mu Karere ka Bugesera basaga 8000 bari hagati y’imyaka 5-11 batangiye guhabwa urukingo rwa Covid-19 rwo mu bwoko bwa Pfizer.
Ni igikorwa cyatangirijwe mu kigo cy’amashuri abanza cya Espoir de l’Avenir mu Murenge wa Nyamata mugitondo cyo kuri uyu wa mbere tariki ya 03 Ukwakira 2022.
Cyafunguwe ku mugaragaro n’Umuyobozi w’Akarere ka Bugesera wungirije ushinzwe iterambere ry’imibereho myiza, Imanishimwe Yvette wamaze impungenge abana baje guhabwa urukingo ababwira ko ari gahunda ya Leta igamije kubafasha gukomeza kugira ubuzima bwiza by’umwihariko kubarinda icyorezo cya Covid-19.
Yagize ati: “Iki gikorwa cyo gukingira abana bari hagati y’imyaka 5 na 11 ni uburyo igihugu cyacu cyashyizeho kugira ngo twirinde Covid 19; kandi murabizi ko n’ababyeyi banyu bakingiwe Covid-19. Muhumure rero ni urukingo rusanzwe kimwe n’izindi muba mwarakingiwe cyera mukiri abana.”
Umuhuzabikorwa w’ibikorwa byo kurwanya Covid-19 mu Karere ka Bugesera, Claire Uwamahoro, avuga urukingo ruri guhabwa aba bana bari hagati y’imyaka 5 na11 ari urwo mu bwoko bwa Pfizer rugenewe abana bari muri iki kigero gusa.
Ati: “Uru rukingo bahabwa rwagenewe abana bari muri iki kiciro cy’imyaka iri hagati y’itanu na cumi n’umwe gusa. Ni ukuvuga ngo rutandukanye n’urwo abantu bakuru bahawe.”
Sebazungu Jeanne, ni umwe mu babyeyi bafite abana bahawe urukingo rwa Covid-19 avuga ko yishimiye igikorwa cyo guha inkingo abana babo akaba ashishikariza abandi babyeyi gufasha abana babo kubona urukingo.
Ati: “Njyewe nk’umubyeyi nishimiye iki gikorwa, cyane ko twari dusanzwe tubizi ko urukingo ari ingenzi ku bana. Rero urukingo rwa Covid 19 rugenewe abana bacu twararusobanuriwe bihagije twumva ari igisubizo mu kugira ngo abana bacu tubarinde icyorezo kandi koko bitewe n’ibyorezo bya hato na hato duhura nabyo, twasanze nk’ababyeyi abana bacu bakwiye gukingirwa; niyo mpamvu twabyemeye tukanabisinyira.”
Mu karere ka Bugesera igikorwa cyo gukingira abana bari hagati y’imyaka itanu na 11 cyatangiriye mu gukingira abana biga mu mwaka wa 6 w’amashuri abana, aho biteganyijwe ko hagomba gukingirwa abana 8,039 biga mu bigo bigera ku 139.
