Ubwo yitabiraga inama y’Inama Njyanama y’Akarere ka Bugesera, Guverineri w’Intara y’Iburasirazuba, CG. Emmanuel Gasana yasabye abagize Inama Njyanana y’Akarere ka Bugesera ko bakwiye gukorana neza batagendeye ku bushobozi bw’umuntu umwe kuko bidindiza imikorere y’inzego z’ubuyobozi n’umurongo wa politiki y’igihugu.
Ni inama yambere yateranye kuri iki cyumweru tariki ya 12 Ukuboza, nyuma y’igihe gito abagize Inama Njyanama y’Akarere ka Bugesera batowe.
Mu mpanuro Guverineri yabahaye harimo no gukorana neza batagendeye ku gutegereza ibitekerezo by’umuntu umwe. Aha Guverineri yabahaye urugero ruto ku muntu uba uyoboye ubukwe.
Ati: “Ni nka cya gihe ujya kureba ugasanga ‘Master of Ceremony’ niwe ukora ibintu byose, yaba ari imbere ugasanga iby’inyuma byapfuye, yaba agiye inyuma iby’imbere bigapfa. Ugasanga mu bintu byose umuntu yabaye umwe gusa, ni kanaka gusa natahaba karaba kabaye.”
Aha kandi CG. Emmanuel Gasana yabasabye kuzamurana mu rwego rwo kubaka ubuyobozi butanga icyizere.
Ati: “kanaka ntahari ari muri konje; aho ntibibe ikibazo; aho niho dukwiye gutsinda rwose.”
Guverineri kandi yabasabye gukemura ibibazo by’abaturage ku buryo bwihuse ariko kandi butarimo guhubuka. Yabasobanuriye uburyo umuyobozi ashobora gufata umwanzuro ku kibazo bigatuma akora amakosa bitewe no kudatekereza neza ku kibazo. Aha ariko abasaba kubanguka mu gufata inyanzuro mu rwego rwo guha umuturage serivisi yihuse kandi inoze.
Mu kiganiro yagiranye na MUHAZIYACU, Perezida w’Inama Njyanama y’Akarere ka Bugesera, Mutumwinka Imerde, yagarutse kuri zimwe mu mpanuro bagiriwe na Guverineri.
Ati: “Mu mpanuro twahawe, harimo ko tugomba gukorera hamwe tugasobekerana, tukagira ubudasa, duharanira guhindura imikorere, twishakamo ibisubizo bikemura ibibazo byugarije abaturage bacu. Yongeye kutwibutsa kandi ko ibyo bidashoborwa n’ufite ibigango, ahubwo bishoborwa n’umuntu wese ufite ubwenge; kandi twese turabufite cyane ko ari nacyo cyatumye abaturage batugirira ikizere bakadutuma.”
Perezida wa Njyanama kandi yabwiye MUHAZIYACU ko bashima ibyo manda icyuye igihe yagezeho kandi ko bagiye kubisigasira ndetse bakarushaho.
Mutumwinka kandi yagarutse kubyo Ubuyobozi bw’Akarere ka Bugesera bwagaragarije inama njyanama nshya ku bikorwa byakozwe muri manda y’imyaka itanu ishize.
Ati: “Twamurikiwe ibyagezweho n’abari bagize manda icyuye Igihe kandi turabashimira kuko bageze kuri byinshi. Nkuko rero twahamagariwe kwishakamo ibisubizo bikemura ibibazo byugarije abaturage bacu, niyo ntego duhagurukanye duhereye kubyagezehwo tubisigasira ndetse tunarushaho gukoresha ubwenge, duhanga udushya kandi dushishikariza buri muturarwanda wese kwigira duharanira yuko umuturage ahora ku isonga.”
