Mu muganda wihariye w’abagore mu Karere ka Bugesera waranzwe n’ibikorwa byo kubaka imirima y’igikoni mu rwego rwo kurwanya imirire mibi n’igwingira mu bana, kubaka udutanda tw’ibyombo ndetse no gusana ubwiherero bigamije kwita ku isuku n’isukura mu rugo.
Iki gikorwa cy’umuganda wihariye w’abagore wabaye kuri uyu wa Gatandatu tariki 14 Gashyantare 2026, aho ku rwego rw’Akarere witabiriwe n’Umuhuzabikorwa w’Inama y’igihugu y’Abagore mu Karere ka Bugesera, Mutumwinka Imerde.
Umwe mu bubakiwe witwa Faida Marie Claudine yishimiye igikorwa bamukoreye ngo kuko nta murima w’imboga yagiraga. Yavuge kandi ko azabungabunga uyu murima bamwubakiye, ati: “Nishimye kubona abagore bagenzi banjye baje kunyubakira akarima k’igikoni ndetse bakanasama ubwiherero. Nanjye ndabizeza ko ibyo banyubakiye nzabisigasira bigatanga umusaruro.”
Umuhuzabikorwa w’Inama y’Igihugu y’Abagore, Mutumwinka Imerde yagaragaje ko umuganda nk’uyu ari kimwe mu bifasha abagore kwesa imihigo ya Mutima w’Urugo, ati: “Mubyo tuba twarahize nka Mutima w’urugo; harimo gusana ubwiherero, kubaka imirima y’igikoni, kubaka udutanda tw’ibyombo tukagera ku isuku muri rusange; kandi ibyo byose bigakorerwa umuturage uri ku mudugudu runaka.”
Yongeyeho ati: “Ni ngombwa ko ibi bikorwa tubishyiramo imbaraga kuko Igihugu cyacu ni gahunda cyihaye yo gukorera ku mihigo, kuko Inama y’Igihugu y’abagore iri mu murongo w’igihugu cyacu. Abo twabikoreye rero tubasaba kubibungabunga ntituzagaruke ngo dusange umurima warumye ahubwo tuzasange imboga ari nyinshi zariyongereye.”
Inama y’Igihugu y’Abagore (CNF/NWC) ni urubuga rw’ubuvugizi n’ubukangurambanga ku bibazo by’abagore, hagamijwe kongera ubushobozi bwabo no kugira uruhare mu iterambere ry’Igihugu.
