Abapolisi bashya 1,652 basoje amahugurwa y’ibanze y’amezi 10 mu Kigo cy’Amahugurwa cya Polisi y’u Rwanda giherereye i Gishari mu Karere ka Rwamagana, aho bagize icyiciro cya 22 cyinjijwe mu kazi kuri uyu wa 28 Ukwakira 2026.
Muri abo bapolisi, abagabo ni 1,315, mu gihe abagore ari 337.
Abagera kuri 60 bazakorera mu Rwego rw’Igihugu rushinzwe Iperereza n’Umutekano (NISS), naho 40 bakazajya mu Rwego rw’Igihugu rushinzwe Igorora (RCS).
Minisitiri w’Umutekano mu Gihugu, Dr Vincent Biruta, wayoboye umuhango wo kubinjiza mu kazi, yavuze ko nubwo umutekano w’u Rwanda muri rusange wifashe neza, hakiri ibyaha bisaba imbaraga z’inzego z’umutekano kugira ngo bikumirwe kandi birwanywe.
Yagize ati: “Haracyagaragara ubusinzi, ikoreshwa ry’ibiyobyabwenge nk’ibyo tumaze iminsi turwanya birimo inzoga zitujuje ubuziranenge, ubujura, gukubita no gukomeretsa, impanuka zo mu muhanda n’ibindi bibazo bihungabanya imibereho myiza n’umutekano by’abaturage bacu mu buryo butandukanye ndetse n’ibyaha bijyana n’iterambere ry’ikoranabuhanga.”
Dr. Biruta yavuze ko imbuga nkoranyambaga n’ikoranabuhanga muri rusange, bishobora gukoreshwa mu bikorwa byubaka cyangwa ibisenya, bityo ko Abapolisi bagomba kugira ubumenyi buhagije bwo guhangana n’ibyaha bikorerwa muri urwo rwego.
Ati: “Uyu munsi wa none, turasabwa guhangana n’ibyaha bikorwa hifashishijwe ikoranabuhanga, uburiganya bwo kuri murandasi, ikoreshwa nabi ry’amakuru n’ikoranabuhanga ry’ubwenge buhangano (AI), ibyaha byambukiranya imipaka, iterabwoba, icuruzwa ry’abantu, ruswa n’ibindi bikorwa bishobora guhungabanya ituze ry’abaturage n’imikorere y’inzego z’Igihugu.”
Yasabye Abapolisi bashya gukoresha ikoranabuhanga mu buryo buboneye, gukumira ibyaha no gufata ibyemezo bishingiye ku mategeko n’ibimenyetso.
Yagize ati: “Birasaba ko umupolisi agira ubushobozi bwo gukumira ibyaha, kumenya gukoresha ikoranabuhanga mu buryo buboneye, kuvugana neza n’abaturage no gufata ibyemezo bishingiye ku mategeko, ku bimenyetso no ku nyungu rusange. Ibi nta handi bitangirira hatari muri aya mashuri n’amahugurwa nk’aya.”
Umuyobozi w’Ikigo cy’Amahugurwa cya Polisi i Gishari, CP Rafiki Mujiji, yavuze ko imitsindire y’abanyeshuri mu bizamini, ikinyabupfura n’umurava bagaragaje mu gihe cy’amahugurwa bitanga icyizere ko bazasohoza neza inshingano zabo.
Yabibukije ko kurangiza amahugurwa y’ibanze ari intangiriro, kuko bazakomeza guhugurwa mu bihe bitandukanye kugira ngo bongere ubumenyi n’ubushobozi bikenewe mu kazi ka Polisi.
Mu myiyereko yakozwe n’aba bapolisi, hagaragajwe ubumenyi mu guhosha imyigaragambyo, kumasha, akarasisi n’imyitozo njyarugamba.
Mu banyeshuri bitwaye neza kurusha abandi, Rct. Shema Moses yabaye uwa mbere muri rusange, akurikirwa na Rct. Gatete Jimmy wabaye uwa kabiri, na Rct. Musinga Abdallah wagize umwanya wa Gatatu.
