Abanyamuryango ba FPR Inkotanyi bagize komisiyo y’ubukungu mu Ntara y’Iburasirazuba biyemeje kongera imbaraga mu gushishikariza abahinzi n’aborozi kwitabira gutangira ubwishingizi ibihingwa n’amatungo byabo mu rwego rwo gukora ubuhinzi n’ubworozi bufite icyerekezo cyiza, kandi buzira igihombo.
Babyiyemeje kuri uyu wa 25 Nzeri mu karere ka Rwamagana, ahateraniye inama y’abagize komisiyo y’ubukungu mu muryango FPR Inkotanyi mu ntara aho yigaga ku mitegurire y’igihembwe cy’ihinga cya 2023A.
Sibomana Jean Nepo ayobora komisiyo y’ubukungu ku rwego rw’Intara y’Iburasirazuba mu muryango FPR Inkotanyi yemeza ko ikibazo cy’ubwishingizi bw’ibihingwa n’amatungo butitabirwa na benshi,
Yakomeje agira ati: “Ntabwo dukangurira abanyamuryango ba FPR Inkotanyi gusa ahubwo abanyarwanda muri rusange turasaba buri muntu wese ukora ubuhinzi n’ubworozi ko akwiye gutekereza ku bwishingizi, kuko iyo ibihe byahindutse bikabangamira imyaka yawe mbere y’uko habura umusaruro wowe washoye mu buhinzi cyangwa ubworozi ni wowe ugira igihombo bwa mbere.”
Komiseri w’ubukungu Sibomana akomeza avuga ko bashishikarira abakora umwuga w’ubuhinzi n’ubworozi kwitabira gahunda yunganiwe na leta nayo y’ubwishingizi kuko bigaragarira mu mibare ko abashinganisha imyaka n’amatungo yabo bakiri bacye.
MUHAZIYACU ifite amakuru y’uko muri iyi ntara y’Iburasirazuba inka zisaga 14,500 zigomba kwishingirwa kugeza ubu izigera ku 1,066 ari zo zimaze kwishingirwa muri uyu mwaka.
Matsiko Gonzague ni umuyobozi w’Akarere ka Nyagatare wungirije ushinzwe iterambere ry’ubukungu yemeza ko abaturage batitabira iyi gahunda babihomberamo, ati: “Bimwe mu byo turi kubona kandi dushishikariza abahinzi n’aborozi ni ugufata ubwishingizi ku bihingwa byabo ndetse n’amatungo yabo, n’ubwo bakiri bacye ariko abagana ibigo by’ubwishingizi iyo hari ikibaye baragobokwa, ibi ni bimwe mu bizadufasha mu bukangurambaga.”
Visi Meya Matsiko akomeza avuga ko muri iyi minsi bafite ikibazo cy’inkuba zikubita inka nyamara ba nyirazo ugasanga nta bwishingizi bagiraga.
Niyodushima Dieudonne ni umwe mu bahinzi bahagarariye abandi bahinga imboga bakazohereza hanze, avuga we yitabiriye gahunda yo gushinganisha ibihingwa bye aho kuri hegitari ihinzeho imiteja batanga amafaranga ibihumbi 99 y’ubwishingizi,
Asobanura uko abona imbogamizi ku bahinzi batitabira cyane gushinganisha imyaka yabo muri ubu buryo, ati: “Hari abahinzi bagihinga bya gakondo, biragoranye ko yabara ibyo ashora byose mu buhinzi bwe, anamenye igiciro adakwiye kutajya munsi, kuba bimugora kubara ayo yashoye ni nako bitamworoheye kumva impamvu akwiye gutanga amafaranga y’ubwishingizi.”
Uyu muhinzi asaba ko ubukangurambaga bukwiye guhera mu kwigisha abaturage kumenya agaciro k’ibyo bashora mu buhinzi, ndetse n’imibyizi yabo n’imiryango yabo bakayiha agaciro ikabarwa nk’amafaranga bashoye.
Abari bitabiriye iyi nama barimo abayobozi b’Akarere bungirije bashinzwe iterambere ry’ubukungu, abashinzwe ubuhinzi, abacuruzi b’inyongeramusaruro ndetse n’abahagarariye abahinzi bose b’abayoboke b’umuryango wa FPR Inkotanyi.
