Abaturage b’Umurenge wa Gashora mu Karere ka Bugesera bishimiye ko bagiye kujya bakira serivisi ku biro by’umurenge bishya batashye ku mugaragaro ku munsi wo Kwibohora ku nshuro ya 32, bikaba ari ibiro byavuguruwe ku bufatanye bw’Akarere n’abaturage b’uyu murenge, byuzura bitwaye arenga Miliyoni 57frw.
Ibi biro by’Umurenge wa Gashora byatashywe kuri uyu wa Gatandatu tariki 04 Nyakanga 2026, bitahwa n’Ubuyobozi bw’Akarere, inzego z’umutekano ndetse n’abaturage b’Umurenge wa Gashora.
Agaruka ku bikorwaremezo byatashywe kuri uyu munsi, Umuyobozi w’Akarere ka Bugesera Mutabazi Richard yasobanuye ko Kwibohora nyako bikwiye gushingira ku bikorwa abaturage bagiramo uruhare mu gufatanya n’ubuyobozi kugera ku iterambere.
Yagize ati: “Kwibohora bivuze umutekano w’abantu n’ibintu, ubwisanzure mu bitekerezo, mu bikorwa no kwihesha agaciro nk’Abanyarwanda. Turashima rero ubuyobozi bukuru bw’Igihugu cyacyu, Leta yahagaritse Jenoside igashyiraho gahunda zigamije kwihutisha iterambere no kuzamura imibereho myiza y’abaturage. Igihugu cyacu gifite amahoro, kandi tugomba gukomeza kuyabyaza umusaruro twubaka iterambere.”
Yakomeje agira ati: “Turashimira abaturage ba Gashora n’abafatanyabikorwa bagize uruhare muri uyu mushinga wo kubaka ibiro by’Umurenge. Ibi ntibirangiriye aha, tuzakomeza gushyira imbaraga mu bikorwa biteza imbere imibereho y’abaturage.”
Bamwe mu baturage bari bitabiriye ibirori byo kwizihiza umunsi wo kwibohora, bagaragaje ibyishimo byo gutaha inyubako y’ibiro by’Umurenge yavuguruwe.
Nkurayija Didas wo ku Kagari ka Biryogo muri uyu murenge wa Gashora, yagize ati: “Ni iby’agaciro gakomeye kubona twaragize uruhare mu kwiyubakira ibiro by’umurenge. Ibi bigaragaza ko natwe dusobanukiwe uruhare rwacu mu iterambere ry’Igihugu ari naryo ryacu. Ubusanzwe twari dufite umurenge ushaje utajyanye n’igihe. Ubu rero umuturage azajya agana ubuyobozi bumwakirire ahantu heza hasobabutse, hajyanye n’igihe.”
Umunyamabanga Nshingwabikorwa w’Umurenge wa Gashora, Umulisa Marie Claire, na we ashimangira ko iyi nyubako igaragaza imbaraga n’ubushake bw’abaturage mu iterambere.
Ati: “Iyi nyubako dutashye ku mugaragaro, ni igihamya cy’ukwibohora nyako. Kwibohora si amateka gusa, ni no gukomeza gukora ibikorwa biduteza imbere, tukibohora ubukene n’ibindi bibazo bikibangamiye imibereho y’abaturage. Turashimira cyane abafatanyabikorwa bacu, abaturage n’Ubuyobozi bw’Akarere ka Bugesera badufashije kugera kuri iki gikorwa.”
Mu Karere ka Bugesera, Umunsi wo Kwibohora ku nshuro ya 32 waranzwe no gutaha inyubako b’ibiro bya Leta zitangirwamo serivisi, zirimo Ibiro by’Umurenge wa Gashora, ibiro by’Akagari ka Ngeruka mu Murenge wa Ngeruka, ibiro by’Akagari ka Rugarama ndetse n’ibiro by’umudugudu wa Rugaraga mu Kagari ka Cyugaro mu Murenge wa Ntarama.
