Ikigo cy’Igihugu cy’Ibarurishamibare-NISR, cyatangaje ibyagaragajwe n’ubushakashatsi bwa 7 ku mibereho n’ubuzima(DHS 7) bugaruka ku bipimo bitandukanye k’ubuzima bw’umubyeyi n’umwana n’ibindi bijyanye n’ubuzima muri rusange, nk’abangavu baterwa inda bigaragara ko biyongereye bakagera kuri 8% bavuye kuri 5% mu 2020.
Iki gikorwa cyo kumurika ibyavuye muri ubu bushakashatsi kuri uyu wa 17 Ukuboza 2025, cyabereye muri Kigali Convention Centre, cyitabiriwe n’abayobozi mu nzego zitandukanye, abahagarariye imiryango yigenga y’imbere mu Gihugu n’iyo ku rwego mpuzamahanga n’abandi.
Ubushakashatsi bwa 7 bwagaragaje ko imibare y’abana bari munsi y’imyaka 5 bagwingira mu Rwanda yageze kuri 27% mu mwaka wa 2025.Ni igabanuka rya 6% kuko ubushakashatsi buheruka bwo mu 2019/2020 bwerekanye ko iyi mibare yari kuri 33%.
Umubare w’abangavu baterwa inda bari hagati y’imyaka 15-19 mu Rwanda wariyongereye mu mwaka wa 2025, ugera ku 8% uvuye kuri 5% wariho mu 2019/2020.
Umuyobozi Mukuru w’Ikigo cy’Igihugu cy’Ibarurishamibare, Ivan Murenzi, yavuze ko ibipimo bishya ku burumbuke bw’Umunyarwandakazi byerekanye ko byageze kuri 3.7% mu 2025. Mu myaka itanu ishize [2019/2020] ubwo hakorwaga ubu bushakashatsi, iki gipimo cyari kuri 4.1%.
DHS ni ubushakashatsi bwatangiye gukorwa mu 1992, ariko bukaba bukorwa buri nyuma y’imyaka itanu kuva mu 2000. Bugaragaza ibipimo by’uko ubuzima bw’abaturage buhagaze mu bijyanye n’uburumbuke, kuboneza urubyaro, inda ziterwa abangavu, ubuzima bw’umubyeyi n’umwana n’ibindi.
