Abatwara abantu kuri moto bakorera mu Mujyi wa Ngoma mu Murenge wa Kibungo baravuga ko batemeranya na Polisi ibasaba kubaza abagenzi bagiye gutwara ibyo bafite mu bikapu mu rwego rwo kwirinda ikwirakwiza ry’ibiyobyabwenge nk’urumogi na kanyaga.
Ibi ni bimwe mu byagarutsweho kuri Sitade y’Akarere ka Ngoma ahabereye ubukangurambaga bwa Ejo Heza na gahunda ya Gerayo Amahoro mu batwara ibinyabiziga bya moto n’amagare tariki 8/12/2025.
Umuyobozi wa Polisi mu Karere ka Ngoma, SP Wilson Musoni yasabye abamotari kugaragaza uruhare rwabo mu gukumira ibiyobyabwenge na magendu.
Yagize ati: “Uje kugutega, ni ukuvuga ngo arimo aragusaba serivise yishyurwa wowe niba ugiye kumutwara ugomba kugira amakenga cyane cyane abagenzi baba bafite ibikapu, buriya umuntu w’umunyabyaha cyangwa ubirimo niyo umurebye mu maso urabyibwira kubera ko nutagira amakenga ukajyera imbere ugafatwa kugira ngo uzumvishe abantu ko uwo muntu mutaziranye birakomeye cyane cyane imbere y’ubutabera.”
SP Musoni yakomeje abwira Abamotari ati: “Niyo mpamvu iyo ugiye gutwara umugenzi uramubwira ngo ugiye hehe, ngiye aha n’aha, mukumvikana ibiciro, ikiba gikurikiyeho uramubwira uti ‘icyo gikapu harimo iki’ ni uburengenzira bwawe kubera ko iyo yanze ku kubwira ikirimo, wamuretse se ko nta kibazo kirimo, ahubwo icyo wakora uwo nguwo uhita umucyeka ugahita uhampagara Polisi byihuse.”
Yavuze ko impamvu ari uko umugenzi ashobora kuba atwaye urumogi cyangwa kanyanga kandi ngo mu gihe afashwe n’umumotari umutwaye azaba umufatanyacyaha.
Bamwe mu bamotari baganiriye na MUHAZIYACU nka Kambanda Augustin, aragira ati: “Urabona nkawe uje gutega umumotari nkakubwira ngo zana igikapu cyawe ndebemo, ni bintu biba bitagaragara neza ngo uje kumusaka ahita yimuka akigira gutega undi, wowe ugasanga ya mafaranga washakaga urayahombye kandi nta kibazo wenda cyari kirimo mu gikapu.”
Kambanda akomeza agira ati: “Igikapu kirimo akabido ka kanyanga urabyumva, ariko ari nk’urumogi ruzingiye mu myenda ntiwarwumva; ahubwo Polisi nidufata ijye ishishoza irebe kuko akenshi nta ruhare tuba dufitemo kuko hari igihe badushinja icyaha.”
Mubyarire Gilbert, ati: “Ni kibazo cyumvikana ariko nk’abamotari bitewe n’ukuntu akazi kabuze tukanaba benshi umuntu uramwanga undi agahita amutwara, icyo gihe wakwihangana ukamutwara aho kugira ngo uhebe amafaranga, gusa kuko bivugiwe hano mu nama birumvikana ko nuwajya kumutwara nasa nk’umutera ubwoba.”
Kuri iyi ngingo, Abamotari basanga Polisi yashyiraho uburyo bwo kugenzura neza kuko kuba umumotari yaryozwa icyaha cy’umugenzi atwaye kandi wenda nta handi bahuriye ngo bacure umugambi kuri ibyo biyobyabwenge; byaba ari nk’akarengane.
