Imiryango igera kuri 250 ituye mu Kagari ka Simbwa, mu Murenge wa Kabarore imaze amezi arindwi itegereje guhabwa mubazi z’amashanyarazi (cash power) kugira ngo ibashe kubona umuriro w’amashanyarazi nk’abandi baturage bawufite.
Aba baturage bavuga ko nubwo hari ibikorwaremezo by’amashanyarazi byamaze gushyirwaho mu gace batuyemo, kugeza ubu batarahabwa mubazi zatuma bacana umuriro.
Basaba ko bafashwa kubona izo mubazi kugira ngo na bo babashe gukoresha amashanyarazi mu ngo zabo.
Hakorimana Innocent, ni umwe muri abo baturage utuye mu Kagari ka Simbwa, avuga ko ipoto y’amashanyarazi iri ku muryango we, mu gihe umuturanyi we yamaze kubona umuriro, ariko we akaba atarawuhabwa nubwo afite ubushobozi bwo kuwugura.
Agira ati: “Ubu ngubu ipoto iri ku muryango wanjye, umuturanyi wanjye afite umuriro, kandi njyewe ntabwo nwufite kandi si uko nabuze amafaranga yo kuwugura, ahubwo ni uko bataraza ngo baduhe mubazi tubashe kuwugura nk’abandi.”
Uwingeneye Delphine, na we utuye muri aka Kagari, avuga ko bamaze igihe kinini bategereje guhabwa mubazi, ariko kugeza ubu bakaba batarabona umuriro. Agira ati: “Batubwiye ko bazaduha mubazi z’umuriro w’amashanyarazi kenshi haza abantu bagafotora none amezi abaye arindwi dutegereze ko twabona umuriro na n’ubu turacyategereje.”
Umuyobozi w’Ikigo cy’Igihugu gishinzwe Ingufu (REG), ishami rya Gatsibo, Mugabo Jackson, avuga ko umushinga wa EPC uzamara amezi 18 uzasiga ukemuye ibibazo birimo no kuba hari abaturage batarahabwa mubazi z’amashanyarazi.
Agira ati: “Umushinga wa EPC uzamara amazi agera kuri 18 uzasiga ukemuye ibyo bibazo byose harimo no kutagira mubazi, kuri ubu umaze amezi 10 ushigaje amezi umunani, ntabwo navuga ko izo mubazi zabuze kuko niba twaramaze gushinga amapoto n’insinga zihari igisigaye ni uguhuza gusa, amezi asigaye azajya kurangira byarakozwe; twabasaba kwihangana.”
Biteganyijwe ko umushinga wa EPC uzageza umuriro w’amashanyarazi ku ngo zigera ku bihumbi 22, bikazagira uruhare mu kongera umubare w’ingo zifite amashanyarazi mu Karere ka Gatsibo.
Kugeza ubu, muri aka karere hari imiyoboro minini y’amashanyarazi ifite uburebure bwa kilometero 52.17, ihuza imirenge ya Gasange, Gitoki, Kabarore, Murambi, Muhura, Ngarama, Remera, Rugarama na Rwimbogo.
Hari kandi imiyoboro mito y’amashanyarazi ifite uburebure bwa kilometero 263.6. Naho muri rusange, ingo zifite umuriro w’amashanyarazi mu Karere ka Gatsibo zigeze ku kigero cya 84.6%.
