Abantu bagera kuri 32 ni bo bimaze gutangazwa ko baburiye ubuzima mu iruka ry’ikirunga cya Nyiragongo cyo muri Repubulika iharanira Demokarasi ya Congo-RDCongo mu Ntara ya Nord Kivu, ryabaye ku wa Gatandatu, ni mu gihe habarurwa abantu basaga ibihumbi 10 bavuye mu byabo.
Mu itangazo ryashyizwe ahagaragara n’ishami ry’umuryango w’abibumbye ryita ku mpunzi UNHCR kuri uyu wa Kabiri tariki 25 Gicurasi 2021 na ryo rigaragaramo ko kugeza ubu aba 32 ari bo bamaze kumenyekana bapfuye.
Umuryango utabara imbabare Croix Rouge muri RD Congo, uvuga ko uwo mubare w’abamaze kuburira ubuzima mu ’iruka ry’ikirunga cya Nyiragongo ushobora kuba urenga aba bantu 32, kuko imibare nibura yaba yamaze kwegeranywa mu minsi itanu.
Kuva ikirunga cya Nyiragongo kimaze kuruka ku mugoroba wo ku wa Gatandatu tariki 22 Gicurasi kugeza ubu ku munsi wa gatatu ingaruka zacyo ziracyakomeje, kuko byakurikiwe n’imitingito ya hato na hato iyoroheje n’ikaze ikomeje kwangiza ibirimo ibikorwaremezo ndetse no gusenya inzu zirimo n’izari zituwemo yaba ku ruhande rwa RDCongo i Goma, ndetse no mu Karere ka Rubavu mu Burengerazuba bw’u Rwanda.
BBC yo yatangaje ko ku ruhande rw’u Rwanda mu Karere ka Rubavu kugeza ubu hari inzu zibarirwa muri za 40 zasenyutse, naho izimaze kwangirika zagiye ziyasa kubera umutingito zibarirwa mu magana.
Umwe mu batuye i Rubavu waganiriye n’iki gitangazamakuru yagize ati: ”Nyuma y’iruka ry’ikirunga haje imitingito, none ubu hashize iminsi ibiri turi kurara hanze, kuva ku cyumweru mugitondo ntabwo twari twagira umutima wo gusubira mu nzu.”
Amakuru ava Rubavu aravuga ko kubera gutinya kugwirwa n’ibikuta by’inyubako n’inzu zituwemo abaturage benshi bahisemo kutazisubiramo, ahubwo bakaba bari kurara hanze.
Mu rwego rwo gukumira ingaruka z’uyu mutingito uri kugaragara bya hato na hato, Ubuyobozi bw’Akarere ka Rubavu bwahagaritse ibikorwa bimwe na bimwe bibera mu nyubako nk’isoko ryo mu mujyi , inzu zimwe na zimwe z’ubucuruzi zirimo n’amagofora n’amwe mu mashuri.
Hari na bimwe mu bigo by’imari bikorera mu nyubako z’i Rubavu bimaze gutangaza ko bibaye bisubitse gutanga serivisi.
AFP itangaza ko kugeza ubu abaturage b’i Goma abenshi bagifite ubwoba, hari n’abahungiye mu Rwanda kubera ubwoba bw’imitingito, abandi bakajya mu bice bitari kugerwaho n’uwo mutingito byo mu gihugu cyabo cya RDCongo.
Ubuyobozi bwa RDCongo bukomeje kugira abaturage inama zirimo n’iyo kwirinda kujya mu duce ikirunga cyarutsemo, kuko hari abashobora kugira ngo ibyo cyarutse byamaze gukomera, bakaba bagira ibyago byo guteberamo; bakaburiramo ubuzima.
Iruka ry’ikirunga rya Nyiragongo ryaherukaga mu mwaka wa 2002 bwo ryahitanye ubuzima bw’abantu bagera kuri 250, risiga ababarirwa mu bihumbi 100 badafite aho kuba.
