Mu byumweru 15, abaturage 180 bo mu Murenge wa Musaza bahuye n’Abubatsi b’Amahoro mu rugendo rwo kuvura ibikomere byo ku mutima, aho bamwe batanga ubuhamya bw’ uko bari barazahajwe n’agahinda, ubukene n’ibibazo by’imiryango; ubu bavuga ko bongeye kubona imbaraga zo kubana n’abandi no kwiyubaka.
Mukeshimana Gorette yari azi ko hari ibyo yanyuzemo byamubabaje, ariko ntiyari azi ko bishobora kuba byaratwikiriye ubushobozi bwiza yari afite.
Nyuma y’ibyumweru 15 muri gahunda “Imenye Wigire” bafashijwemo n’Umuryango Ubuntu Center for Peace yasojwe kuri uyu wa Gatanu tariki 28 Kanama 2026, avuga ko yamenye ko buri muntu afite ‘urumuri’ rushobora kumurika abandi, ariko rugashobora kuzimywa n’ibikomere.
Ati:“Mbere ntabwo nari nzi ko ndi umurasire, ariko namenye ko ahantu hose ndi urumuri. Urumuri ntiruzima, ahubwo ruzimywa n’ibyugarije urwo rumuri.”
Mukeshimana yari umwe mu bantu 180 bagize amatsinda atandatu y’Abubatsi b’Amahoro basoje iyi gahunda mu Murenge wa Musaza, Akarere ka Kirehe.
Ibyumweru 15 by’isanamitima n’isanamibanire byasojwe mu Kagari ka Gasarabwayi, Umudugudu wa Nyakariba ya Mbere, ku bufatanye bw’Abubatsi b’Amahoro n’Ubuntu Center For Peace
Gahunda yari igamije gufasha abaturage kumenya ibikomere bafite, kubaka ubudaheranwa, kongera kwiyakira no gukorera hamwe.
Mukeshimana avuga ko amateka, uburwayi n’ubukene bishobora gutuma umuntu yisanga mu bwigunge.
Ati: “Hari amateka menshi yaranze Igihugu cyacu yadukozeho cyane. Wayibuka ukumva urakomeretse. Hari n’uburwayi n’ubukene bigatuma umuntu yiheba, akumva atari umuntu, ntiyajya no mu bandi bantu.”
Ariko amasomo yahawe ngo yamufashije gutandukanya ibyamubayeho n’uwo ari we. Ati: “Namenye ko ibyo byose nahuye na byo ngomba kubitambuka, nkagenda nkaba undi muntu, nkamurikira n’abandi ngahinduka mu mico no mu myifatire.”
Yongeyeho ko iryo hinduka ryageze no ku mibanire ye.
Ati: “Hari igihe umuntu yanyuragaho ntamvugishe, ariko mfata umwanzuro wo kumuvugisha kuko ntacyo dupfa, ahubwo ari bya bikomere nahuye na byo.”
Sibomana Alphonse na we avuga ko uru rugendo rwamukuye mu bwigunge.
Ati: “Naje hano mfite agahinda, nguma mu nzu, ariko uko bigaragara nsigaye ntanga ibiganiro mu bandi.”
Abubatsi b’amahoro bashya bavuga ko gukira ibikomere bigomba guherekezwa n’iterambere ry’imibereho yabo.
Ati: “Ubu turemerana amatungo magufi no kubakirana uturima tw’igikoni… ubu mbese tugiye gufatanya n’amatsinda, dutezanye imbere twubake u Rwanda rw’ejo hazaza.”
Nyirahabineza Alphonsine we, ibikomere byari bifitanye isano n’umuryango n’ubuzima bw’umwana we. Avuga ko umugabo we yari yaramutanye inda ifite amezi atanu, nyuma umwana ararwara cyane, amafaranga yo kumuvuza arashira.
Ati: “Umwana bamushyize muri Neo, ntanga amafaranga menshi, ngera aho numva ubushobozi bwarangiye.”
Yaje kwinjira mu Bubatsi b’Amahoro, asangira n’abandi ubuzima n’ibyamubabaje. Uru rugendo rwamugejeje ku cyemezo cyo kubabarira umugabo we.
Ati: “Ngeze aho ndamubohora, ndamubwira nti ‘ndaho, taha uze murugo, urugo ni urwawe.’ Njyewe ndakubabariye kubera ko Abubatsi b’Amahoro banyigishije.”
Umuyobozi w’Akarere ka Kirehe wungirije ushinzwe iterambere ry’ubukungu, Nzirabatinya Modeste, avuga ko ibikomere bishobora kugira ingaruka ku mibereho n’iterambere ry’umuryango.
Ati: “Umuntu ufite ibikomere ntahinga, ntiyishyura Mituweli… ahora mu makimbirane, abana be ntibajya ku ishuri, aba umukiliya wa Polisi na RIB.”
Yasabye abasoje aya masomo mvurabuzima muri gahunda ya ‘Imenye wigire’ y’Ubuntu Center for Peace kutareka amatsinda yabo, ahubwo bakabera Abubatsi b’amahoro no ku bandi baturage batitabiriye iyi gahunda.
Yagize ati: “Umuntu wakize ntabwo agomba gusubira inyuma… Akazi ntabwo karangiye; mugomba kwagura mu mudugudu wose, mugomba gukiza ibikomere akagari kose n’umurenge wa Musaza ugakira nk’uko mumeze.”
Ku bantu 180 basoje “Imenye Wigire”, ibyumweru 15 byabaye intangiriro yo kwiyubaka kuruta kuba iherezo ry’urugendo.
