Umunyamabanga Nshingwabikorwa w’Akagari ka Ntebe gaherereye mu Murenge wa Muhazi, Kayihura Eric, yirukanwe mu kazi nyuma yo gufatirwa mu kabari yasinze yarenze ku mabwiriza yo kwirinda COVID-19.
Byabaye mu ijoro ryakeye mu Mujyi wa Rwamagana ubwo uyu muyobozi yasangwaga mu kabari yasinze agatabwa muri yombi n’itsinda basangiraga.
Amakuru yizewe agera kuri MUHAZIYACU avuga ko Polisi n’izindi nzego zishinzwe umutekano zakoze umukwabo mu tubari tubiri two muri uyu mujyi hafatirwamo abantu benshi bajyanwa kuri Polisi. Ngo hari n’akabari izi nzego zagiyemo abahasanzwe bashaka kubarwanya.
Uwahaye amakuru MUHAZIYACU yavuze ko Gitifu Kayihura yasanzwe yasinze maze umuyobozi w’Akarere n’abashinzwe umutekano batumaho impapuro zimwandikisha ibaruwa y’ubwegure bwe.
Yavuze ko kimwe mu byatumye yirukanwa ari uko ngo atari inshuro ya mbere uyu muyobozi afatirwa mu kabari yasinze ngo akaba yari yarihanangirijwe.
Abandi bafatanwe na we ngo baciwe amande barekurwa mugitondo nk’uko umunyamakuru wa MUHAZIYACU wageze kuri Polisi yasanze bari guhabwa inyemezabwishyu mbere y’uko barekurwa.
MUHAZIYACU yagerageje kuvugisha Umuyobozi w’Akarere ka Rwamagana, Mbonyumuvunyi Radjab ariko inshuro zose yahamagawe ndetse n’ubutumwa bugufi yandikiwe ntiyigeze agira icyo asubiza.
MUHAZIYACU irakomeza gukurikirana iyi nkuru.
