Bamwe mu bakuru b’imidugudu bo mu Karere ka Kayonza barasaba inzego zibakuriye ko urugamba rwo guca burundu inzoga zitemewe mu baturage rudakwiye guharirwa mudugudu, ushinzwe umutekano n’abajyanama b’ubuzima gusa.
Kuri uyu wa 19 Kanama i Mukarange, hateraniye inama mpuzabikorwa y’akarere ihuza abayobozi b’inzego z’ibanze kuva ku rwego rw’Umudugudu kugeza ku karere, abafatanyabikorwa b’Akarere, abavugarikumvikana, aho baganiraga ku iterambere ry’akarere, umutekano, no kubangabunga ubuzima rusange bw’abanyakayonza.
Bamwe mu bakuru b’imidugudu baganiriye n’abanyamakuru bemeje ko hari aho urugamba rwo guca burundu inzoga zitemewe baruvunishwamo na bagenzi babo batorewe izindi nshingano mu mudugudu, bityo aba nabo bakaba bakwiye kubazwa inshingano bahawe.
Mukeshimana ni umukuru w’umudugudu wa Ruyonza muri Ruramira abisobanura muri aya magambo ati: “Uko turi mu ngamba si ko twese tuzihuriyeho kuko hari bamwe mupanga gahunda yo kurwanya izi nzoga bagaca inyuma bakabibwira abazikora n’abazicuruza mu buryo bwo kubaburira.”
Iki kibazo ngo ni kimwe mu bikwiye kwitabwaho kuko bituma n’abaturage batinya gutanga amakuru ku bayobozi kuko hari bamwe muri bo bakorana, cyangwa nabo banywa izi nzogo zitemewe bityo bakabibwira aba bagizi ba nabi, ari naho bahera bahohotera abaturage batanze amakuru y’aho izi nzoga zikiri.
Havugiyaremye Rameki ni umukuru w’umudugudu wa Kagoma mu Kagari k’Isangano mu Murenge wa Ndego, yemeza ko abatorewe inshingano zitandukanye mu mudugudu bakeneye amahugurwa, bagasobanurirwa inshingano bafite batorewe kuko abenshi batererana abakuru b’imidugudu.
Yakomeje agira ati: “Mu mudugudu hari inzego nyinshi abari mu nshingano barenga 50 ariko bose ntubabona mu nshingano.”
Aba bakuru b’imidugudu bahamya ko urugamba rwo kurandura inzoga zitemewe rutakunda adafatanyije n’abandi bari mu nshingano, nyamara ngo abo mu nzego z’akagari n’umurenge n’Akarere iyo baje birebera Umukuru w’umudugudu gusa n’ushinzwe umutekano nyamara batawuyobora bonyine.
Umuyobozi w’Akarere ka Kayonza w’agateganyo Hategekimana Fred yemeza ko hatekerejwe ishuri ry’abayobozi, yagize ati: “Ntabwo umuyobozi yabaho adafite uko akomeza kwiyungura ubumenyi, turashaka uburyo tubikora.”
Meya Hategekimana yakomeje avuga ko iyi gahunda bise ishuri ry’umuyobozi izakemura ikibazo cy’uko hari bamwe mu batorewe inshingano bisanga baheruka ibyo batorewe ku munsi w’amatora, bityo nabo bakamenya ko ikibaye cyo mu mudugudu na we kimureba nk’umuyobozi.
Ibi byose ngo bigaruka ku buzima rusange bw’akarere kuko aho usanga umudugudu udatanga Mituweli 100% cyangwa se ngo wubahirize gahunda za Leta 100% uhasanga icyo kibazo cy’imikorere n’imikoranire itanoze, aha kandi hagarutswe no kuri bamwe mu bakuru b’imidugudu bashaka kwikubira inshingano, umudugudu bakawufata nk’uwabo.
Ubwo Guverineri w’Intara y’Iburasirazuba Rubingisa Pudence yaganirizaga aba bayobozi b’i Kayonza yashimye uruhare rw’abakuru b’imidugudu mu kazi bakora k’ubukoranabushake, abasaba kongera imbaraga mu kazi kabo kandi bagakorana neza n’abaturage n’izindi nzego bakora nazo.
Ubwo iyi nama mpuzabikorwa y’Akarere ka Kayonza yasozwaga hasinywe imihigo hagati y’imirenge n’akarere, ahanini iyi mihigo ikubiyemo ibikorwa biteza imbere imibereho myiza y’abaturage.
