Ubuyobozi bw’Akarere ka Nyagatare burakangurira abaturage kwihutisha kwishyura ubwisungane mu kwivuza (Mutuelle de Santé), nyuma y’uko imibare igaragaza ko ubwitabire bugeze kuri 55% gusa.
Ubuyobozi buvuga ko buri muturage akwiye kwishyura ku gihe kugira ngo abashe kubona serivisi z’ubuvuzi igihe azikeneye, kuko indwara itera idateguje.
Mu Karere ka Nyagatare, abaturage 652,438 ni bo biteganyijwe ko bazatanga ubwisungane mu kwivuza mu mwaka wa 2026–2027, ariko kugeza ubu abamaze kwishyura ni 360,993, bingana na 55% by’abagomba kubutanga.
Nubwo iki kigero gikomeje kwiyongera, ubuyobozi bw’Akarere buvuga ko hakenewe imbaraga nyinshi kugira ngo abaturage bose bishyure, bityo Akarere kagere ku ntego yo kugira ubwisungane mu kwivuza ku kigero cya 100%.
Mu rwego rwo gukomeza kubishishikariza abaturage, ubuyobozi bw’Akarere bubinyujije mu bikorwa bitandukanye birimo umuganda rusange, inteko z’abaturage n’izindi gahunda zihuza abaturage, babasobanurira akamaro ko kugira ubwisungane mu kwivuza no kwirinda gutegereza igihe indwara yabagezeho.
Umuyobozi w’Akarere wungirije ushinzwe imibereho myiza y’abaturage Murekatete Juliet aganira na MUHAZIYACU, yavuze ko igihe abaturage bagomba kuba bamaze kwishyura cyageze, bityo abasigaye bakwiye kubyihutisha.
Yagize ati: “Icyo dusaba abaturage ni uko bakomeza gushyira imbaraga mu gutanga ubwisungane mu kwivuza. Twifuzaga ko aho amatariki ageze ubu twakabaye turi ku rwego rwo hejuru kurusha uru turiho, abaturage bose bafite ubwisungane mu kwivuza. Turabakangurira rero kwihutisha kwishyura kugira ngo bajye bahabwa serivisi z’ubuvuzi mu buryo bwiza kandi bwihuse.”
Yakomeje avuga ko ubuyobozi budahwema kwegera abaturage bubashishikariza gusobanukirwa akamaro k’ubwisungane mu kwivuza, ndetse bukanafasha abafite ibibazo by’ibyiciro.
Ati: “Mu nteko z’abaturage no mu bindi bikorwa duhuriramo na bo, duhora tubashishikariza gutanga ubwisungane mu kwivuza no kubereka inyungu zabwo ku buzima bwabo n’imiryango yabo. Hari abaturage bagaragaje ibibazo bijyanye n’ibyiciro by’Ubudehe, bakajurira. Ku bufatanye n’inzego z’ibanze turimo kubafasha gukosora aho bikenewe, ariko n’abasanga nta mpamvu yo guhindurirwa bagasobanurirwa impamvu kugira ngo nabo bishyure.”
Visi Meya Murekatete yanibukije abaturage bajuririye ibyiciro byabo ko badakwiye gutegereza imyanzuro yose ngo babone kwishyura, ahubwo ko bakwiye gutangira bishyura amafaranga bemera, kuko iyo umuntu amaze kwishyura nibura 75% by’umusanzu we aba ashobora guhabwa serivisi z’ubuvuzi.
Yagize ati: “Turasaba umuntu ufite icyiciro arimo kujuririra gutangira akishyura ayo yemera, andi akazaza yiyongeraho. Iyo umuntu amaze kwishyura nibura 75% by’ayo agomba gutanga, ashobora kuvurwa. Ntabwo bikwiye ko tugeze mu kwezi kwa Kanama hari abaturage batarishyura ubwisungane mu kwivuza.”
Ubuyobozi bw’Akarere ka Nyagatare bwizeza ko buzakomeza ubukangurambaga mu mirenge yose hagamijwe kongera umubare w’abatanga ubwisungane mu kwivuza, kugira ngo buri muturage abashe kubona serivisi z’ubuvuzi igihe azikeneye.
