Inama Njyanama y’Akarere ka Kirehe yemeje ko abaturage 31 bazahabwa ingurane ikwiye ingana na 17,570,590 Frw ku mitungo yabo yangijwe n’imishinga y’inyungu rusange muri aka Karere ka Kirehe.
Iki cyemezo cyafatiwe mu nama yateranye ku wa 30 Kamena 2026, yasuzumye ibijyanye no kwemeza inyandikomvugo y’inama iheruka, raporo z’ibikorwa bya Komite Nyobozi, ingengo y’imari y’umwaka wa 2026/2027 ndetse na gahunda y’itangwa ry’amasoko.
Hashingiwe ku ibaruwa no 4658/07.05.05 yo kuwa 11/06/2026 yanditswe n’Umuyobozi w’Akarere ka Kirehe asaba ko Inama Njyanama yakwemeza urutonde rw’abaturage 31 basabirwa ingurane ikwiye ku mitungo yabo yangijwe ku mpamvu z’inyungu rusange.
Hashingiwe kandi ku itegeko no 32/2015 ryo kuwa 11/06/2015 ryerekeye kwimura abantu ku mpamvu z’inyungu rusange cyane cyane mu ngingo yaryo ya 9 isobanura inzego zemeza ko abantu bimurwa ku mpamvu z’inyungu rusange.
Abagize Inama Njyanama y’Akarere ka Kirehe bemeje ko abaturage 31 bahabwa ingurane ikwiye ingana n’amafaranga y’u Rwanda Miliyoni cumi na zirindwi n’ibihumbi Magana atanu na mirongo irindwi na Magana atanu na mirongo icyenda (17,570,590frw) azishyurwa mu bice 2 bikurikira:
Hari abaturage 4 bazishyurwa n’Ikigo cy’Igihugu gishinzwe Iterambere rya Taransiporo/Ubwikorezi mu Rwanda(RTDA) bakishyurwa ingurane ikwiye ingana n’amafaranga y’u Rwanda Miliyoni cumi n’esheshatu n’ibihumbi Magana abiri na birindwi na Magana cyenda na mirongo icyenda n’atanu (16,202,995frw) kubera ko imitungo yabo yangijwe mu ikorwa ry’umuhanda Kayonza Rusumo.
Hakaba n’abaturage 27 bazishyurwa n’Ikigo cy’Igihugu gishinzwe Iterambere ry’Ubuhinzi n’Ubworozi mu Rwanda (RAB) bakishyurwa ingurane ikwiye ingana n’amafaranga y’u Rwanda Miliyoni imwe n’ibihumbi Magana atatu na mirongo itandatu n’abiri na Magana atanu mirongo icyenda n’atanu (1,362,595frw) imitungo yabo ikaba yarangijwe mu bikorwa byo gutunganya imiyoboro yo kuhira mu mirenge ya Nyamugali na Mahama.
Perezida w’Inama Njyanama y’Akarere ka Kirehe, Prof. Dr. Kabera Callixte, yavuze ko izi ngurane zigamije kubahiriza amategeko ateganya ko abaturage bahabwa ingurane ikwiye mbere yo kwimurwa cyangwa mbere y’uko ibikorwa by’iterambere bitangira.
Yagize ati: “Kugira ngo umushinga ubashe gukorwa nuko umuturage aho yimurwa aba yabanje kubona ya ngurane ikwiye, aho rero nibyo bikorwa bitandukanye bizakorwa mu Karere nibyo byagenewe ingengo y’imari kugira ngo aho imishinga izanyura cyane iy’ubuhinzi ndetse n’abandi bangirije ibikorwa n’umuhanda Kayonza -Rusumo aho hari ibikorwa niho hagenewe ingurane izahabwa abaturage mbere yuko iyi mishinga itangira gushyirwa mu bikorwa.
