Ihuriro ry’Abafatanyabikorwa mu Iterambere ry’Akarere ka Nyagatare (JADF-Nyagatare) rifite uruhare rukomeye mu kuzamura imibereho myiza y’abaturage no gushyigikira gahunda z’iterambere mu Karere ka Nyagatare, binyuze mu bikorwa bitandukanye birimo iby’ubukungu, imibereho myiza n’imiyoborere myiza.
Abafatanyabikorwa bagize iri huriro bakora ibikorwa bihura n’ibikubiye muri gahunda y’iterambere ry’Akarere (DDS) ndetse n’imihigo y’Akarere, bityo bakagira uruhare mu kwihutisha iterambere.
Imibare igaragaza ko JADF y’Akarere igizwe n’abafatanyabikorwa 99, aho ibikorwa by’abafatanyabikorwa mu mwaka wa 2025/2026 bigera 9,067,319,625. Ibi bigaragaza uruhare rugaragara mu gushyigikira gahunda zitandukanye z’Akarere, n’iterambere ry’abaturage.
Abafatanyabikorwa bagaragaza uruhare rufatika mu iterambere bakora ibikorwa bitandukanye birimo gufasha urubyiruko kubona imirimo, guteza imbere imibereho myiza y’abaturage ndetse no kubaka ubushobozi mu miyoborere n’ibindi.
Bamwe mu bagize Ihuriro ry’Abafatanyabikorwa mu Iterambere ry’Akarere (JADF) baganiriye na MUHAZIYACU bashimira uruhare bagira mu iterambere bishingiye ku bikorwa bakora bitandukanye ndetse n’ubufatanye buboneye bagirana n’Akarere.
Uwitwa Uwimana Alphonsine uhagarariye ARCT Ruhuka ikaba ari umufatanyabikorwa mu bijyanye no kwita ku buzima bwo mu mutwe[MHPSS], yagize ati “Uruhare rwacu mu iterambere ry’Akarere ni uko iyo umuntu afashijwe ku bibazo byo mu mutwe tumufasha kugirana imibanire n’abandi, akagira ubushobozi bwo guhangana n’ibibazo bisanzwe mu buzima, gukora neza no kugira uruhare mu iterambere ry’umuryango n’Igihugu. Turashimira kandi ubuyobozi imikoranire iboneye tugirana.”
Safari Desmond uhagarariye Never Again Rwanda na we yavuze ko ibikorwa byabo byibanda ku kubaka amahoro no guteza imbere urubyiruko, aho bamaze kurutera inkunga irenga miliyoni 10 Frw mu mishinga yo kwihangira imirimo.
Yagize ati “Uyu muryango ubundi uharanira amahoro no kurwanya akarengane, uruhare rwacu mu iterambere ry’Akarere ubu twafashije urubyiruko kwihangira umurimo aho twaruteye inkunga ya miliyoni 10Frw, ubu bakaba bari kwiteza imbere, ikindi kandi twigisha urubyiruko kwirinda ikintu icyo aricyo cyose cyabangamira intego yacu yo kwimakaza amahoro no kurwanya akarengane.”
Musiime Fred, Uhagarariye umuryango utari uwa Leta CRD (Citizen Rights and Development) bakaba ari abafatanyabikorwa b’Akarere ka Nyagatare mu bikorwa bitandukanye, ati “Duteza imbere uruhare ry’umuturage mu miyoborere, igenamigambi ndetse n’ifatwa ry’ibyemezo biciye mu kubigisha gahunda za Leta kugira ngo bazigiremo uruhare, twubaka kandi ubushobozi bw’inzego z’ibanze biciye mu mahugurwa ndetse no guha urubuga umuturage kugira ngo abashe gutanga ibitekerezo mu bimukorerwa n’ibindi.”
Yongeye ati “Dufasha urubyiruko kwihangira imirimo, guteza imbere isuku n’isukura dufasha abaturage kubaka uturima tw’igikoni, kandagira ukarabe, ubwiherero n’ibindi, dukangurira kandi abana kujya mu mashuri tubaha ibikoresho by’ibanze no gukangurira ababyeyi kugira uruhare mu burezi bw’abana babo ku bufatanye n’umuryango World Vision Rwanda.”
Nubwo hari ibikorwa byinshi byiza bikorwa n’abafatanyabikorwa, ubuyobozi bw’Akarere bugaragaza ko hakiri imbogamizi zikeneye gukosorwa kugira ngo uruhare rwa JADF rurusheho gutanga umusaruro.
Mu nama iherutse guhuza abafatanyabikorwa n’ubuyobozi bw’Akarere muri uku kwezi kwa Werurwe, hagaragajwe ko zimwe muri izi mbogamizi zituruka ku mikoranire idahagije igaragara mu bafatanyabikorwa bamwe na bamwe, kudahuza amakuru no kudashyira imbaraga mu gukurikirana ibikorwa byateguwe. Bityo, abafatanyabikorwa basabwe kunoza imikoranire, kongera ubufatanye no gutanga umusanzu ugaragara mu bikorwa by’iterambere.
Hagaragajwe ko bamwe mu bafatanyabikorwa batuzuza inshingano zabo uko bikwiye, harimo kudatanga raporo ku gihe, kudahuza ibikorwa n’imihigo y’Akarere ndetse no kutitabira inama uko bikwiye.
Imibare igaragaza ko gutanga gahunda z’ibikorwa (action plan) biri ku kigero cya 83.3%, gutanga raporo biri kuri 75%, kwitabira inama bikaba biri ku kigero cya 95%, mu gihe ishyirwa mu bikorwa ry’ibyemejwe riri ku kigero cya 59.4%.
Umuyobozi w’Akarere w’agateganyo, Kakooza Henry, asaba abafatanyabikorwa kongera imbaraga mu mikoranire no kunoza imikorere kugira ngo barusheho gutanga umusaruro uhagije.
Yagize ati: “Hari bamwe mu bafatanyabikorwa batubahiriza inshingano zabo nk’uko bikwiye, cyane cyane mu gutanga raporo no kugaragaza ibikorwa bikorwa. Ibi bigira ingaruka ku iterambere ry’Akarere, ni yo mpamvu tubasaba kunoza imikorere no gukorera hamwe, ntibyambuza gushimira kandi imikoranire tugirana mu rwego rwo guteza Akarere kacu imbere dushyigikira gahunda y’umuturage ku isonga.”
Muri rusange, JADF igira uruhare rukomeye mu iterambere ry’Akarere, ariko ubuyobozi bushimangira ko kongera imikoranire, kunoza itumanaho no kubahiriza inshingano ari byo bizatanga umusaruro ufatika kurushaho, bityo abaturage bakarushaho kugerwaho n’iterambere rirambye.
