Hari bamwe mu bagore bo mu Karere ka Kayonza bakina Basketball bahamya ko uyu mukino wahinduye imibereho mu ngo zabo ndetse ubu urukundo rwariyongereye hagati yabo.
Mu mpera z’iki Cyumweru gishize, ku kibuga cya Nyamirama habereye imikino yo kugaragaza impano no kwizihiza umunsi mpuzamahanga w’Umugore ubusanzwe uba ku ya 08 Werurwe, ni igikorwa cyateguwe ku bufatanye bw’Akarere ka Kayonza n’Umuryango Shooting Touch
Ubuhamya butangwa na bamwe mu batuye i Nyamirama, bishimira ko siporo yabafashije guhindura imyumvire mu mibereho yabo nk’uko Uwemeyimana Pelagie, umaze imyaka itanu ndetse n’umwe mu bana be aho yiga ku ishuri abifashwamo n’uko azi gukina Basketball
Yakomeje agira ati: “Kuva twatangira siporo mu ugo rwacu byarahindutse, yongereye urukundo kurusha uko twari turi, yaba hagati yanjye n’umugabo n’abana twese ubuzima bwarahindutse.”
Uwimana Belancile nawe ahamya ko umukino wa Basketball watumye ahindura imyumvire, yagize ati: “Ubu siporo twayihaye agaciro ariko mbere twabifataga nk’uburara, byari bigoranye ko twakumvikana murugo, ariko ubu twese twarasobanukiwe ahubwo usanga twararushijeho kunga ubumwe.”
Hari undi mukecuru w’imyaka 75 na we ukina uyu mukino w’amaboko, yemeza ko siporo yamufashije kuva mu bwigunge, ahubwo buri munsi aba yumva yajya guhura n’abandi, dore ko bakina ku wa mbere no ku wa kane, ni ukuvuga ku minsi ibiri mu cyumweru.
Masengesho Elina ni umwe mu bagize komite y’inama y’Igihugu y’abagore mu Karere ka Kayonza yemeza ko bafite ingamba zo kongera imbaraga mu bukangurambaga ku bagore kugira ngo bakore siporo kuko iyo umugore atinyutse agakora siporo bimuhuza n’abandi bagatekereza ku iterambere ndetse bikamurinda indwara zitandura; ibi kandi byose bijyana n’ubusabane mu ngo zabo n’abaturanyi babo.
Baguma Sacha ni Umuyobozi muri Shooting Touch Rwanda ahamya ko Basketball bayifashisha mu guhuza abaturage no kubigisha, yakomeje agira ati: “Siporo yabaye umuhuza, yaba abaturage, urubyiruko, abana, aba bose baba bafite ahantu ho kuganirira nyuma yo gukina.”
Yemeza ko ibi byose biba bigamije kwigisha abaturage akamaro ka siporo mu kwirinda indwara, kubungabunga ubuzima bw’umubiri n’ubw’ubwonko; no kumenya akamaro k’ubwisungane mu kwivuza.
