Umuturage witwa Afurika wo mu Murenge wa Mugesera mu Karere ka Ngoma yatemye ishyamba rye ashaka gutwika amakara kandi nta byangombwa, afatwa n’urwego rwunganira Akarere mu mutekano-DASSO; maze ubuyobozi bumuca amande y’ibihumbi 600Frw bishingiye ku itegeko.
Ibi byabaye kuri uyu wa 23/01/2026 mu Karere ka Ngoma, Umurenge wa Mugesera, Akagari Mugatare mu Mudugudu w’Icocorero.
Umuyobozi w’Akarere wungirije ushinzwe iterambere ry’Ubukungu, Mapambano Nyiridandi Cyriaque yabwiye MUHAZIYACU ko amashyamba agira uko atunganwa, agira ingengo y’imari iyagendeho ariko bigamije kuyabungabunga.
Visi Meya Mapambano yakomeje agira ati: “Hagiyeho ingamba zo kuba duhana ababikora nta burenganzira babisabiye nubwo yaba ari ayabo, nka bariya ba Mugesera bafashwe kandi barahanwa n’abandi ntabwo tuzabajenjekera ariko tutarahana tutagira ngo tunigishe.”
Yakomeje agira ati: “Tutagirango tubwire abaturage n’umuntu ufite ishyamba rye ko agomba gusaba ibyangombwa kugira ngo tumurebere mu buryo buri tekenike ko ntabyo ari bwangirize cyangwa niba agiye kuritema ritarera kugira ngo niba ari irye hari inyungu rusange rigomba gutanga.”
Visi Meya Mapambano yasabye abaturage kureka gutema amashyamba nta burenganzira, bakayoboka inzira zemewe ndetse bakirinda no gutema aya Leta.
Gutema ishyamba utabiherewe uruhushya n’inzego zibishinzwe (Akarere cyangwa Umurenge) ni ikosa rihanwa n’amategeko. Ibi bireba amashyamba ya Leta ndetse n’ay’abantu ku giti cyabo.
Itegeko nº 046/2024 ryo ku wa 04/06/2024 rigenga amashyamba n’ibiti, rivuga ko umuntu usarura ishyamba rye nta ruhushya, aba akoze ikosa akabihanirwa
Umuntu usarura ishyamba rye nta ruhushya, aba akoze ikosa. Ahanishwa kwishyura ihazabu yo mu rwego rw’ubutegetsi ingana n’inshuro imwe y’agaciro k’ibiti cyangwa ubuso yasaruye.
