Inzego zitandukanye zo mu Karere ka Ngoma zagaragaje ko ingengabitekerezo ya Jenoside, kutamenya abafunguwe bakoze Jenoside, bamwe mu bavugabutumwa bayobya Abanyarwanda, abakoze Jenoside batateguwe neza n’ibindi ko ari bimwe mu bikibangamiye ubumwe n’ubudaheranwa muri aka Karere.
Ibi ni byagarutsweho ku ya 25/10/2025 ubwo mu cyumba cy’inama rusange cy’Akarere ka Ngoma haberaga inama ngarukamwaka y’ihuriro ry’ubumwe n’ubudaheranwa, ifite insanganyamatsiko igira iti “Twimakaze ubumwe n’ubudaheranwa.”
Muri iyi nama hanagaragajwe ishusho y’ibyakozwe mu kwimakaza ubumwe n’ubudaheranwa bw’Abanyarwanda birimo kwita ku barokotse Jenoside yakorewe abatutsi batishoboye, kurangiza imanza zaciwe n’Inkiko Gacaca n’ibiganiro bya Ndi Umunyarwanda mu byiciro byose.
Iyi nama yahuje abagize ihuriro ry’ubumwe n’ubudaheranwa mu Karere ka Ngoma yibanze ku bijyanye no kungurana ibitekerezo ku buryo bwo guhangana n’ibibazo bihungabanya ubumwe bw’Abanyarwanda.
Umunyamabanga Nshingwabikorwa w’Umurenge wa Remera, Kanzayire Consolée yavuze ko kutamenya abantu bakoze Jenoside bafungurwa bibagiraho ingaruka.
Ati: “Hari umuntu ufite uko yasohotse muri gereza akimeze kwa kundi kubera ko ntaragira amahirwe yo guhura n’abantu ngo bongere baganire ku buzima bundi bushya binjiyemo. Nk’imbogamizi maze iminsi mpura nayo, mfite umuryango n’ubu ntarabasha kumenya uko nzakemurira ikibazo.”
“Umugore yarahigwaga yarashakanye n’uwishe, umugabo arakatirwa arafungwa amara ya myaka yakatiwe aragaruka, umugore afite ipfunwe ry’uko umugabo we yakoze Jenoside, umugabo aragarutse asanze umugore aracyafite cya gikomere cy’uko umuryango we bawishe. Icyo bakoze umugabo yarahageze umugore aragenda(arahukana) umugabo yisanga ari wenyine, umugore nyuma yaje kugaruka gusa ntibabana ahubwo afata akumba hanze ke wenyine.”
Mutabazi Kennedy, Uhagarariye abafite ubumuga mu nama njyanama y’Akarere ka Ngoma, yagize ati: “Bimwe mu mbogamizi zihari kandi abantu tugomba guca kandi twese dufatanyije ni ingengabitekerezo usanga mu mudugudu no mu tugari, bamwe itaravamo burundu ndetse ugasanga harimo amagambo y’inzago agenda avugwa asesereza.”
Umuyobozi w’Akarere ka Ngoma, Niyonagira Nathalie yashimiye abagiye batanga abitekerezo, asaba abitabiriye ubufatanye mu kwimakaza ubumwe n’ubudaheranwa
Yagize ati: “Tujye tuzirikana ko Nyakubahwa Perezida wa Repubulika yadusabye ko tugomba kuba umwe nk’Abanyarwanda, tukabazwa ibyo dukora ariko no kureba kure; kuba umwe rero ni amahitamo yacu.”
Hari ibiteganyijwe ngo izo nzitizi zikurweho
Muri iyi nama abayitabiriye biyemeje gukomeza kugira uruhare mu kuyobora ibiganiro nk’ibi byubakiye ku muco w’amahoro na Ndi Umunyarwanda, aho batuye cyangwa bakorera no kugaragaza ahakiri ibisigisigi by’ivangura n’amacakubiri bishingiye ku dutsiko tw’ironda (Uturere abantu bakomokamo, itangwa ry’imirimo, amadini/amatorero, n’ibindi).
Ikindi bavuze ko bagiye kongera imbaraga mu gukurikirana no gusesengura ibyahungabanya ubumwe n’ ubudaheranwa bw’Abanyarwanda bigakumirwa hakiri kare; kandi ibyagaragaye bikajya bitangirwa amakuru ku gihe mu nzego bireba.
Muri iyi nama hagaragajwe ikibazo cy’imyemerere idahura n’indangagaciro z’umuco nyarwanda, aho bamwe mu bavugabutumwa bayobya Abanyarwanda, bakabatanya, ndetse rimwe na rimwe bakabahanurira ubuhanuzi bw’ibinyoma bibabuza gukora ibikorwa bibateza imbere, n’ibindi.
Bemeje ko Abanyamadini bahindura imyumvire bakajya batanga inyigisho zubaka abayoboke babo, bakikebura bakagirana inama; bakajya inama zubaka byaba ngombwa bakananenga ibitagenda neza.
Iri huriro ryagaragaje ko gukomeza kuba hafi abagifite ibikomere n’ihungabana bigira ingaruka ku kwiyubaka kw’abantu ku giti cyabo n’amakimbirane mu miryango agera ku gusenyuka kwayo ndetse rimwe na rimwe hakaziramo n’ubwicanyi, n’ibindi.
Undi mwanzuro ni uwo kugira uruhare mu gutoza ibyiciro byose by’Abanyarwanda cyane cyane ababyiruka kurangwa n’indangagaciro na kirazira z’umuco nyarwanda.
Ubushakashatsi bwa MINUBUMWE bwa 2023, bugaragaraza ko abanyarwanda bageze ku gipimo gishimishije cy’Ubudarehanwa aho ubudaheranwa ku muntu ku giti cye bugeze kuri 75% mu gihe ku rwego rw’inzego buri ku kigero cya 92%.
