Kayonza: Guhinga ku butaka buhuje byabongereye umusaruro w’ibigori

Abahinzi bahinga ku butaka buhuje mu Murenge wa Gahini mu Karere ka Kayonza bavuga ko guhuza ubutaka byabazamuriye umusaruro kuko byabazamuriye ubumenyi ndetse bikaba binaborohereza kubona amafumbire n’imbuto.

Bamwe mu bahakoresha bari muri koperative Twitezimbere Nyabombe, ikoresha ubutaka buhuje iri mu Mudugudu wa Nyabombe mu Kagari ka Juru, yatangiye muri 2006 ihinga igihingwa cy’ibigori, kuri ubu ifite abanyamuryango 63.

Mukagatesi Vestine, utuye mu Mudugudu wa nyabombe, avuga ko byababereye byiza kuko bituma bahingira ku gihe, ngo bigatuma bose batizanya imbaraga bagahinga vuba ntihagire umuntu usigara inyuma.

Kandi ngo kubera guhingira hamwe bahinga imbuto z’indobanure, nta muntu uhinga ngo ahinge imbuto yiboneye yose.

Yongeye ati: “Itandukaniro ririmo kuri njyewe, ni byiza kubera ndi muri koperative, kera ngihinga njyenyine nta myumvire narimfite, nahingaga ibyo niboneye, nkumva yuko ibyo mpinze bimpagije. Ariko ubungubu itandukaniro nuko guhinga twese muri rusange bituma umuntu atangiza ibyo yahinze, kandi ibyo wejeje bikakugirira akamaro.”

Ubu uyu mubyeyi ashobora gukura imifuka 10 y’ibigori aho yakuraga umufuka umwe, asobanura ati: “Dukoresha ifumbire, dukoresha imbuto z’indobanure, tugiye tunafite ubumenyi, bigatuma tweza ibitubutse.”

Uwabeza Clemence, undi munyamuryango wa koperative, we avuga ko iyo bahingiye hamwe bakanagurishiriza hamwe bibagirira akamaro.

Ati: “Umuntu guhinga ku giti cye burya aba ari ugutatanya imbaraga, kuko iyo uri guhinga ku giti cyawe, hari igihe utabona nk’amahugurwa kuko baba batakuzi, icyo gihe uhinga mu kajagari, ntanubwo uba uzi ibigenerwa ubuhinzi, icyo gihe rero kuko muri koperative baba bahabwa amahugurwa atandukanye bifasha kubona ubumenyi bihagije.”

Uwabeza asobanura ko mbere agihinga ku giti cye yahingaga ibivuyemo akumva bihagije, ariko ngo koperative yamweretse ko bitari bihagije, kuko nk’ubu akura toni zigera muri eshanu kuri hegitari, ariko mbere atarabonaga izirenze eshatu.

Nsengimana Jean Bosco, umuyobozi wa koperative Twitezimbere Nyabombe, atangaza ko abanyamuryango ba koperative bagera kuri 63 bahinze kuri ku buso bungana na hegitari 25, ubu biteguye kubona umusaruro w’ibigori urenga toni eshanu kuri hegitari.

Avuga ko ubu abanyamuryango bamaze kwishyura mituweri y’uyu mwaka, nibasarura bazahita bishyura iy’umwakaa utaha, ubu kandi bose bari muri gahunda y’ubwizigame bw’igihe kirekire EjoHeza, ngo babasha kandi kwishyurira abana amafaranga y’ishuri.

Umunyamabanga Nshingwabikorwa w’Umurenge wa Gahini Rukeribuga Joseph asobanura ko guhinga ku butaka buhuje biri muri gahunda ya Leta, bifitiye abaturage akamaro, bisaba guhinga igihingwa cyateguye bikanorohera ubuyobozi gufasha aba bahinzi gushaka amasoko.

Ati: “Bitworohera kubashakira amasoko kuko baba bahingiye hamwe, bikavanaho ubumamyi, bimwe buri wese wejeje umusaruro ku giti cye aza imyaka agurisha uko yishakiye bigatuma banamuhenda; ariko iyo bahinze ku butaka buhurijweho nka kuriya, byoroha gushaka isoko, byoroha kugena igiciro, igiciro kandi cyungura umuturage.”

Iyi site yitwa Buyanja, yose iriho hegitari 262, usibye iyi site, hari n’izindi site zirimo iy’ahitwa mu Rukore iriho hegitari 120.